بۇگىن سەناتتىڭ جالپى وتىرىسىندا قازاقستان رەسپۋبليكاسى الەۋمەتتىك كودەكسى مەن ىلەسپە زاڭدار قابىلداندى، دەپ حابارلايدى اlmaty-akshamy.kz قازاقپاراتقا سىلتەمە جاساپ.
«الەۋمەتتىك كودەكستى ازىرلەۋ - حالىقارالىق ستاندارتتارعا ساي كەلەتىن الەۋمەتتىك قورعاۋ جۇيەسىن قۇرۋ جونىندەگى مەملەكەتتىك ساياساتتىڭ ستراتەگيالىق ماڭىزدى شەشىمدەرى مەن ناتيجەلەرىنىڭ ءبىرى. الەۋمەتتىك كودەكس ءارتۇرلى زاڭنامالىق اكتىلەردىڭ ورنىنا الەۋمەتتىك ساياساتتىڭ قۇقىقتىق نەگىزى بولماق، ونىڭ نەگىزگى باسىمدىقتارى - حالىقتى جۇمىسپەن قامتۋدى ىنتالاندىرۋ جانە ازاماتتاردىڭ الەۋمەتتىك قورعالۋ دەڭگەيىن ارتتىرۋ. جۇرگىزىلگەن رەفورمالاردىڭ ناتيجەسىندە حالىقتى الەۋمەتتىك قورعاۋدىڭ كوپ دەڭگەيلى جۇيەسى قۇرىلادى جانە الەۋمەتتىك قامسىزداندىرۋعا جاۋاپكەرشىلىك مەملەكەت، جۇمىس بەرۋشى جانە قىزمەتكەر اراسىندا بولىنەتىن بولادى»، - دەدى سەناتور ءلاززات قالتايەۆا.
وسى ورايدا ول قۇجاتتاردىڭ نەگىزگى باعىتتارىنا توقتالدى.
مۇگەدەكتىگى جانە اسىراۋشىسىنان ايىرىلۋى بويىنشا مەملەكەتتىك الەۋمەتتىك جاردەماقىلاردىڭ، مۇگەدەكتىگى بار بالانى تاربيەلەپ وتىرعان ادامدارعا، ءبىرىنشى توپتاعى مۇگەدەكتىگى بار ادامعا كۇتىم جاساۋدى جۇزەگە اسىراتىن ادامدارعا بەرىلەتىن مەملەكەتتىك جاردەماقىلاردىڭ سوماسىن ءوسىرۋ ەسكەرىلگەن. سونداي-اق ساياسي قۋعىن-سۇرگىن قۇرباندارىنا جانە ساياسي قۋعىن-سۇرگىننەن زارداپ شەككەن، مۇگەدەكتىگى بار نەمەسە زەينەتكەر بولىپ سانالاتىن ادامدارعا، ەرەكشە ەڭبەگى ءۇشىن زەينەتاقى بەكىتىلگەن ادامدارعا ارناۋلى مەملەكەتتىك جاردەماقىلار سوماسىن كوتەرۋ قاراستىرىلعان.
دەپۋتاتتىڭ ايتۋىنشا، قىلمىستىق-اتقارۋ جۇيەسى مەكەمەلەرىندەگى جانە ءبىرىنشى توپتاعى مۇگەدەكتىگى بار سوتتالعانعا كۇتىم جاساۋدى جۇزەگە اسىراتىن سوتتالعان ادامدارعا مەملەكەتتىك جاردەماقى الۋ قۇقىعىن بەرۋ قامتىلعان. جاردەماقى سوماسى شامامەن 65 مىڭ تەڭگەنى قۇراماق. قازىرگى كەزدە ءبىرىنشى توپتاعى مۇگەدەكتىگى بار 54 ادام سوتتالعان.
سونىمەن قاتار ءجۇرىپ-تۇرۋى قيىن ءبىرىنشى توپتاعى مۇگەدەكتىگى بار ادامدارعا قىزمەت كورسەتەتىن جەكە كومەكشىلەردى مىندەتتى الەۋمەتتىك ساقتاندىرۋمەن قامتاماسىز ەتۋ ەسكەرىلگەن.
«بۇل نورما ءبىرىنشى توپتاعى مۇگەدەكتىگى بار ادامدارعا قىزمەت كورسەتەتىن 30 مىڭعا جۋىق جەكە كومەكشىنى مىندەتتى الەۋمەتتىك ءارى مەديسينالىق ساقتاندىرۋمەن قامتاماسىز ەتەدى»، - دەدى ل.قالتايەۆا.
ونىڭ سوزىنە قاراعاندا، قانداستاردىڭ قازاقستانمەن بايلانىسىن نىعايتۋ جانە ەلىمىزدە ولاردىڭ الەۋەتىن ىسكە اسىرۋ ماقساتىندا بيزنەس- يمميگرانتتارعا نەمەسە ەتنيكالىق قازاقتار (باسقا ەلدەردىڭ ازاماتتارى) اراسىندا كاسىپتەرى بار ادامدارعا بەرىلەتىن «اتا جولى» كارتاسى ۇعىمى ەنگىزىلدى.