پاريج وليمپياداسى قازاقستان سپورتشىلارىنىڭ كاسىبي دايىندىعىنىڭ كورسەتكىشى بولادى. بۇل تۋرالى 2024 جىلى پاريجدە وتەتىن وليمپياداعا دايىندىق ماسەلەلەرى جونىندە كەڭەس وتكىزگەن ق ر مادەنيەت جانە سپورت ءمينيسترى داۋرەن ابايەۆ ايتتى، دەپ حابارلايدى Almaty-akshamy.kz قازاقپارات-قا سىلتەمە جاساپ.
«وزدەرىڭىزگە بەلگىلى، ەكى جىلدان كەيىن – پاريج وليمپياداسى. ءتورتجىلدىقتىڭ باستى دوداسىنا وسى جيىننان باستاپ قىزۋ دايىندىققا كىرىسۋىمىز قاجەت. ءبىز بۇعان دەيىن كادرلىق، بيۋروكراتيالىق بارلىق ماسەلەنى شەشتىك دەپ ويلايمىن. ءبىراق، ءبىزدى ودان دا ۇلكەن، جاۋاپتى جۇمىستار كۇتىپ تۇر. پاريج وليمپياداسى كاسىبي دايىندىعىمىزدىڭ كورسەتكىشى بولماق»، - دەدى مينيستر.
ونىڭ اتاپ وتۋىنشە، ءار جاقسى ناتيجە ءۇشىن فەدەراسيا باسشىلارى، جاتتىقتىرۋشىلار، باپكەرلەر، ءتيىستى سالا ماماندارى جەكە-جەكە جاۋاپتى بولادى.
«توكيو مەن بەيجىڭ ويىندارى سپورتشىلارىمىزدىڭ دايىندىعىنا قاتىستى ماسەلەنىڭ كۇردەلەنىپ كەتكەنىن كورسەتتى. ولاردىڭ كەيبىرى، ءتىپتى ليللەحاممەردەگى، اتلانتاداعى ويىنداردان بەرى كەلە جاتقانىن بايقاۋعا بولادى. فرانسيادا سول ولقىلىقتاردىڭ بارلىعىن تۇزەۋىمىز قاجەت»، - دەدى داۋرەن ابايەۆ.