الماتىدا 36 مىڭنان استام ادام تۇرعىن ءۇي كەزەگىندە تۇر
بيىل 3 مىڭنان استام الماتىلىق قونىستويىن تويلايدى، دەپ حابارلايدى Almaty-akshamy.kz Almaty.tv-گە سىلتەمە جاساپ.
ولار مەملەكەتتىك «نۇرلى جەر» باعدارلاماسى اياسىندا سالىنىپ جاتقان ۇيلەرگە جايعاسادى. قالالىق قۇرىلىس باسقارماسىنىڭ مالىمەتىنشە، الماتىدا 36 مىڭنان استام ادام تۇرعىن ءۇي كەزەگىندە تۇر. كەزەگى جەتكەندەر مەن قۇجاتى تالاپقا سايكەس كەلگەندەرگە جىل سوڭىنا دەيىن وسى «جاس قانات» ىقشاماۋدانىندا سالىنىپ جاتقان تۇرعىن ۇيدەن پاتەر كىلتى بەرىلەدى. ءبىرىنشى بولىپ كوپبالالى وتباسى، جالعىز باستى انالار، مۇمكىندىگى شەكتەۋلى بالا اسىراپ وتىرعاندار نازارعا الىنادى. كەيىننەن مەملەكەتتىك قىزمەتتەگى جاس وتباسىنا قولداۋ كورسەتىلەدى.
«41 ءۇي. 3116 پاتەر. 163 مىڭ شارشى مەتر بيىل پايدالانۋعا بەرىلەدى. 185 پاتەر – كوپبالالى انالارعا ارنالعان. 216 پاتەر – وسال توپتارعا ارنالعان. 2705 پاتەر – كرەديتتىك پاتەرلەر بولىپ سانالادى»، – دەدى قۇرىلىس باسقارماسىنىڭ ءبولىم باسشىسى ايدار نۇرعوجايەۆ.
جاڭا كەشەن اۋماعى 36-85 شارشى مەتر ەكونوم ساناتىنداعى 124 پاتەردەن تۇرادى. تۇرعىن ءۇي كەشەنىنىڭ ماڭىندا اۆتوتۇراق پەن بالالار الاڭى دا قاراستىرىلعان. سونداي-اق مۇندا 1500 بالاعا ارنالعان مەكتەپ پەن ەمحانا قۇرىلىسى ءجۇرىپ جاتىر. الەۋمەتتىك نىسان جىل سوڭىنا دەيىن قولدانىسقا بەرىلەدى.
جالپى ءقازىر قالادا جەڭىلدەتىلگەن نەسيەمەن «شاڭىراق»، «باقىتتى وتباسى» جانە «الماتى جاستارى» باعدارلامالارى ارقىلى ءۇي الۋعا بولادى. جىلدىق مولشەرلەمەسى 2-5 پايىز ارالىعىنداعا جوبا ماقساتى – الەۋمەتتىك ساناتتاعى جانۇيالار مەن جاس وتباسىلاردى تۇرعىن ۇيمەن قامتۋ.
«كوپبالالى انالار بار، مۇگەدەك بالا اسىراۋشى وتباسىلار بار، جەتىم بالالار پاتەر كەزەگىندە تۇرادى، ءبىراق ولار پاتەر جالداپ تۇرسا، سول اقشانىڭ 50 پايىزىن ۇكىمەت تولەپ بەرەدى»، – دەدى كوممۋنالدىق ينفراقۇرىلىمدى دامىتۋ باسقارماسىنىڭ ءبولىم باسشىسى عالىمجان ابدىشۇكىر ۇلى.
سونداي-اق قالادا قابىرعاسى قامىستان تۇرعىزىلعان ەسكى ۇيلەردى ءسۇرۋ جوسپارلى تۇردە جۇزەگە اسىپ كەلەدى. ولاردىڭ باسىم بولىگى تۇركسىب اۋدانىندا ورنالاسقان. ايماقتا 1229 تۇرعىن ءۇي بولسا، ونىڭ 600-گە جۋىعى ەسكىرگەن.