وليمپيادانى ۇيىمداستىرۋشىلار حوك ۇسىنعان مۇمكىندىكتى پايدالانىپ، جالپى ويىندى قىزىقتى وتكىزۋ ماقساتىندا قوسىمشا سپورت تۇرلەرىن ەنگىزدى.
ۇلتتىق وليمپيادا كوميتەتىنىڭ دەرەگىنشە، پاريج وليمپياداسىن ۇيىمداستىرۋ كوميتەتى 2024 جىلعى جازعى ويىنداردىڭ باعدارلاماسىن ۇسىندى، دەپ حابارلايدى Almaty-akshamy.kz.
پاريج-2024 جاستاردىڭ كوڭىلىنەن شىعاتىن جانە سپورتتىق ناتيجە مەن شىعارماشىلىقتى ارتتىراتىن ءتورت سپورت ءتۇرىن ويىن باعدارلاماسىنا قوستى.
ناقتىراق ايتساق، پاريجدە برەيكينگ، سپورتتىق قۇزعا ورمەلەۋ، سكەيتبوردينگ پەن سەرفينگتەن جۇلدەلەر ويناتىلادى.
برەيكينگ (برەيك-دانس) 2018 جىلى بۋەنوس-ايرەستە وتكەن جاسوسپىرىمدەر وليمپياداسىندا العاش رەت جەڭىمپازداردى انىقتادى. ەندى پاريجدەگى وليمپيادا ويىندارىنىڭ باعدارلاماسىنا رەسمي تۇردە ەنىپ وتىر. وليمپيادا باعدارلاماسىنان الىناتىن سپورت تۇرلەرى دە انىقتالدى. پاريجدە توكيو ويىندارىنداعى ءۇش سپورت تۇرىنەن جارىستار وتكىزىلمەيدى. ناقتىلاپ ايتار بولساق، كاراتە، بەيسبول مەن سوفتبول وليمپيادا باعدارلاماسىنان شىعارىلدى.
پاريجدەگى وليمپيادا ويىندارىندا 32 سپورت تۇرىنەن جۇلدە تاراتىلادى. الەمنىڭ 200-دەن اسا مەملەكەتىنەن كەلگەن سپورتشىلار 306 جۇلدە جيىنتىعىن ساراپقا سالادى.
2024 جىلعى وليمپيادا ويىندارىنىڭ باعدارلاماسىنا ەنگەن سپورت تۇرلەرى:
اكادەميالىق ەسۋ، بادمينتون، باسكەتبول (ونىڭ ىشىندە 3x3 باسكەتبول بار)، بوكس، كۇرەس، برەيكينگ، ۆەلوسپورت، سۋ سپورتى تۇرلەرى، ۆولەيبول، جاعاجاي ۆولەيبولى، گاندبول، گيمناستيكا (باتۋت، سپورتتىق گيمناستيكا، كوركەم گيمناستيكا)، گولف، بايداركا مەن كانوەدە ەسۋ، دزيۋدو، ات سپورتى، جەڭىل اتلەتيكا، ۇستەل تەننيسى، جەلكەندى سپورت، رەگبي-7، سەرفينگ، سكەيتبوردينگ، قازىرگى بەسسايىس، سپورتتىق قۇزعا ورمەلەۋ، ساداق اتۋ، سپورتتىق اتۋ، تەننيس، ترياتلون، تاەكۆوندو، اۋىر اتلەتيكا، فۋتبول، كوگالداعى حوككەي،
ايتا كەتەيىك، پاريجدەگى وليمپيادا ويىندارى 2024 جىلدىڭ 26 شىلدەسى مەن 11 تامىزى ارالىعىندا وتەدى.