پارا شاڭعى جارىسى مەن پارا بياتلوننان الەم كۋبوگىنىڭ سوڭعى كەزەڭىنىڭ قورىتىندىسى جاريالاندى.
سايىس ناتيجەسى بويىنشا قازاقستان قۇراماسى 3944 ۇپاي جيناپ، توپ-5-كە كىردى، دەپ حابارلايدى Almaty-akshamy.kz Astana.tv-عا سىلتەمە جاساپ.
جەكە ەسەپتە ەربول حاميتوۆ پارا بياتلوندا 790 ۇپايمەن ەكىنشى، ال شاڭعى جارىسىندا 752 ۇپايمەن ءۇشىنشى ورىنعا يە بولدى. بىلتىر بەيجىڭدە وتكەن قىسقى پاراليمپيادانىڭ جۇلدەگەرى الەكساندر گەرليس تە ماۋسىمدى «ۇزدىك بەستىكتىڭ» قاتارىندا اياقتادى. ونىڭ ەنشىسىندە 630 ۇپاي بار.
قازاقستان كومانداسى بارلىعى 13 مەدال جەڭىپ الدى. ونىڭ ىشىندە 2 التىن، 5 كۇمىس جانە 6 قولا.
«ءبىز ءۇشىن پاراليمپيادالىق سپورتتىڭ ماڭىزى وليمپيادالىق سپورت تۇرلەرىنەن كەم ەمەس. سوندىقتان ءبىز ەرەكشە قاجەتتىلىكتەرى بار ادامدارعا سپورتتا وزدەرىن تاۋىپ، ناتيجەگە جەتۋى ءۇشىن مۇمكىندىگىنشە بارلىق جاعدايدى جاسايمىز. قازاقستان قۇراماسىن وسى ناتيجەمەن قۇتتىقتايمىن جانە سپورتشىلارىمىزعا بولاشاقتا دا سپورتتىڭ بيىك شىڭدارىن باعىندىرۋدى تىلەيمىن»، - دەدى مادەنيەت جانە سپورت ۆيسە-مينيسترى سارسەن قۇرانبەك.