پاراليمپياداشىلار ەڭبەگى ەلەندى
قازاقستان رەسپۋبليكاسىنىڭ پرەزيدەنتى قاسىم-جومارت توقايەۆتىڭ جارلىعىمەن داۆيد دەگتياريەۆ III دارەجەلى «بارىس» وردەنىمەن، زارينا بايباتينا، تەمىرجان داۋلەت، ءانۋار سارييەۆتەر «پاراسات» وردەنىمەن، نۇرداۋلەت جۇماعالي «قۇرمەت» وردەنىمەن ماراپاتتالدى، دەپ حابارلايدى Almaty-akshamy.kz.
ق ر مەملەكەتتىك حاتشىسى قىرىمبەك كوشەربايەۆ جاپونيا استاناسى توكيودا وتكەن XVI جازعى پاراليمپيادا ويىندارىنا قاتىسقان سپورتشىلارمەن كەزدەسىپ ولارعا مەملەكەتتىك ناگرادالارى مەن قارجىلاي سەرتيفيكاتتارىن تابىستادى.
«كەشە عانا تورتكۇل دۇنيە ەرەن ەرىك-جىگەردىڭ، تەمىردەي ءتوزىمنىڭ، ومىرگە قۇشتارلىقتىڭ كۋاسى بولدى. جاراتقان ادامنىڭ مۇمكىندىگىن شەكتەگەنىمەن، نيەتىن شەكتەمەيتىنىن كوزىمىزبەن كوردىك. توكيودا وتكەن پاراليمپيادا ويىندارىندا تاعدىردان تەپەرىش كورگەن جانداردىڭ ەرلىگىنە جەر ءجۇزى تىك تۇرىپ قۇرمەت كورسەتتى. ولاي بولۋى زاڭدىلىق ەدى. ويتكەنى ولار تەپسە تەمىر ۇزەتىن، ون ەكى مۇشەسى ءدىن-امان، دەنى ساۋ كەي ادامدار جەتە الماعان جەتىستىككە جەتىپ، بەلەستى باعىندىرىپ، جەڭىس تۋىن جەلبىرەتتى. راسىندا، بۇل قانداي قۇرمەتكە دە، قوشمەتكە دە لايىق ارەكەت»، – دەدى قىرىمبەك ەلەۋ ۇلى.
سونىمەن قاتار توكيو پاراليمپياداسى ەلىمىز ءۇشىن اسا تابىستى بولعانىن، ءدۇبىرلى دودادا قازاقستاندىق سپورتشىلار 5 مەدال يەلەنىپ، ەلىمىز ءۇشىن رەكوردتىق كورسەتكىش ورناتقانىن اتاپ ءوتتى. قىرىمبەك كوشەربايەۆ ءىس-شارا بارىسىندا التىن مەدال العان داۆيد دەگتياريەۆكە 106 ميلليون تەڭگە، كۇمىس مەدالگە يە بولعان زارينا بايباتينا، تەمىرجان داۋلەت، ءانۋار سارييەۆتەرگە 63 ميلليون تەڭگە، قولا جۇلدەگەر اتانعان نۇرداۋلەت جۇماعاليگە 31 ميلليون تەڭگە قارجىلاي سىياقى تابىستادى. سالتاناتتى ءىس-شاراعا پرەمەر-مينيستردىڭ ورىنباسارى ەرالى توعجانوۆ، مادەنيەت جانە سپورت ءمينيسترى اقتوتى رايىمقۇلوۆا قاتىستى. جيىن سوڭىندا قازاقستان سپورتشىلارىنىڭ اتىنان داۆيد دەگتياريەۆ پەن تەمىرجان داۋلەت ءسوز سويلەپ، مەملەكەت باسشىسىنا العىس ايتتى.