پانفيلوۆ اۋدانىنداعى وبلىس اكىمىنىڭ رەزيدەنسياسى بالالاردى وڭالتۋ ورتالىعىنا اينالدى

نىسان 40 ورىنعا لايىقتالعان

بۇگىن پانفيلوۆ اۋدانىندا بۇرىن وبلىس اكىمىنىڭ رەزيدەنسياسى بولعان عيمارات «مەرەي» بالالاردى وڭالتۋ ورتالىعى رەتىندە اشىلادى. ەسكە سالساق، وسى نىساندى وڭالتۋ ورتالىعىنا بەرۋ تۋرالى شەشىم بيىلعى جىلدىڭ ناۋرىز ايىندا قابىلدانعان بولاتىن، - دەپ حابارلايدى Almaty-akshamy.kz جەتىسۋ وبلىسى اكىمىنىڭ باسپا ءسوز قىزمەتىنە سىلتەمە جاساپ. 

اۋدان تۇرعىندارىن وسى ەلەۋلى وقيعامەن وبلىس اكىمىنىڭ ورىنباسارى رۋستام الي قۇتتىقتادى. 

عيماراتتى جاڭعىرتۋ جۇمىستارىنا، قاجەتتى قۇرال-جابدىقتار مەن جيھازدار ساتىپ الۋعا 80 ملن. تەڭگە جۇمسالدى. ورتالىقتا مونتەسسوري كابينەتى، فيزيوتەراپيا، ەمدىك دەنە شىنىقتىرۋ، سول سياقتى سەنسور، ماسساج، پروسەدۋرالىق كابينەتتەر، لوگوپەد، دەفەكتولوگ بولمەلەرى، تۇز شاحتاسى، باسسەين ت.ب بار. ەكى كورپۋستان تۇراتىن عيماراتتىڭ جالپى الاڭى 910،4 شارشى مەتر. نىسان 40 ورىنعا لايىقتالعان. 

اتاپ وتسەك، جىل باسىنان بەرى جەتىسۋ وبلىسىنىڭ الاكول، سارقان، قاراتال اۋداندارىندا ەرەكشە قاجەتتىلىگى بار بالالارعا ارنالعان جالپى سانى 140 ورىندى وڭالتۋ ورتالىقتارى اشىلعان بولاتىن.