ۇقشۇ اسكەري كوميتەتىنىڭ وتىرىسى ءوتتى

بۇۇ-نىڭ بىتىمگەرلىك قىزمەتىنە قوسىلۋ تۋرالى ءسوز بولدى

قورعانىس ءمينيسترىنىڭ ءبىرىنشى ورىنباسارى – قازاقستان رەسپۋبليكاسى قارۋلى كۇشتەرى باس شتابىنىڭ باستىعى گەنەرال-لەيتەنانت مارات قۇسايىنوۆ ۇجىمدىق قاۋىپسىزدىك تۋرالى شارت ۇيىمى اسكەري كوميتەتىنىڭ وتىرىسىنا قاتىستى، دەپ حابارلايدى Almaty-akshamy.kz.

بەينەكونفەرەنسبايلانىس رەجيمىندە وتكەن كەڭەسكە ارمەنيا، بەلارۋس، قازاقستان، قىرعىزستان، رەسەي جانە تاجىكستان قارۋلى كۇشتەرى باس شتابتارىنىڭ باستىقتارى قاتىستى.

وتىرىس بارىسىندا ۇقشۇ ۇجىمدىق قاۋىپسىزدىك وڭىرلەرىندەگى اسكەري قاۋىپسىزدىككە تونەتىن قاۋىپ-قاتەرلەر مەن سىن-تەگەۋرىندەر قارالىپ، ولارعا قارسى ءىس-قيمىل شارالارى دا تالقىلاندى.

ودان باسقا ۇقشۇ-نىڭ بىتىمگەرلىك الەۋەتىن دامىتۋ، سونىڭ ىشىندە بۇۇ-نىڭ بىتىمگەرلىك قىزمەتىنە قوسىلۋ تۋرالى ءسوز بولدى.

تاجىكستان رەسپۋبليكاسى قورعانىس مينيسترلىگىنىڭ باسقارۋ پۋنكتىندە قورعالعان بەينەكونفەرەنسبايلانىستىڭ اقپاراتتىق باعىتىن كەڭەيتۋ جايلى دا اقپارات تىڭدالدى.

كەزدەسۋگە قاتىسۋشىلار ۇيىمدى جەتىلدىرۋ، ۇقشۇ-عا مۇشە مەملەكەتتەردىڭ اسكەري اۆياسياسىنىڭ حالىقارالىق ۇشۋلارىن قامتاماسىز ەتۋ اسپەكتىلەرىن جانە باسقا دا ءبىرقاتار وزەكتى ماسەلەلەردى قاراستىردى.