كونستيتۋسيا كۇنى جانە ءبىلىم كۇنى مەرەكەلەرى قارساڭىندا اققۇدىق اۋىلداعى بايباتشايەۆ اتىنداعى 120 ورىندىق مەكتەپ سالتاناتتى تۇردە اشىلدى.
بۇعان دەيىن اپاتتى دەپ تانىلعان بۇرىنعى مەكتەپ وتكەن جىلدىڭ جەلتوقسان ايىندا جۇمىسىن توقتاتقان بولاتىن. جاڭا مەكتەپكە 703،030 ملن تەڭگە قارجى ءبولىنىپ، مەردىگەر كومپانيا «نۇر-شاپاعات كۇرىلىس» ج ش س نىساندى مەرزىمىندە اياقتاعان، دەپ حابارلايدى Almaty-akshamy.kz الماتى وبلىسى اكىمدىگىنە سىلتەمە جاساپ.
ەكى جىل كەپىلدىك بەرىلگەن مەكتەپ ءىشى تولىقتاي زاماناۋي ماتەريالدىق بازامەن قامتىلعان.
اشىلۋ سالتاناتىنا قاتىسقان اۋدان اكىمى تالعات ومىرالييەۆ كونستيتۋسيا كۇنىمەن قۇتتىقتاپ، وڭىردەگى ءبىلىم سالاسىنداعى اتقارىلىپ جاتقان جۇمىستارعا توقتالدى.
«قازىرگى ۋاقىتتا جىل سايىن اۋدانىمىزدا 2-3 مەكتەپتى ءتۇرلى باعىتتا كەزەڭ-كەزەڭىمەن جاڭارتىپ جاتىرمىز. بيىلدىڭ وزىندە ەكى مەكتەپ سالىنىپ جاتىر. بىرنەشەۋىنە كۇردەلى جوندەۋ جۇمىستارى جۇرگىزىلمەك. مىنە، كوپتەن كۇتكەن وسى اۋىلدىڭ مەكتەبى سىزدەردىڭ يگىلىكتەرىڭىزگە بەرىلدى. بارشا بۇلدىرشىندەردى جاڭا ءبىلىم كۇنىمەن قۇتتىقتايمىن»، - دەدى اۋدان باسشىسى.
ال، جاڭا وقۋ جىلىن جاڭا مەكتەپتە باستاعان زاڭعار ايتقوجانىڭ قۋانىشىندا شەك جوق.
«بۇرىنعى مەكتەپتە سپورت زال جوق بولاتىن. جازدا دالادا جۇرەتىن ەدىك. ەندى جاڭا مەكتەپتە ءبارى بار. مەن سپورتپەن اينالىسامىن. بولاشاقتا چەمپيون اتانعىم كەلەدى. مەكتەپ سالىپ بەرگەن بارشا اعالارعا راحمەت ايتامىن»، - دەدى.
جۇرت يگىلىگىنە بەرىلگەن مەكتەپ 2736،84 شارشى مەتر اۋماقتى الىپ جاتىر. تولىق ورتا ءبىلىم بەرەتىن وقۋ ورداسىندا 126 وقۋشىعا 28 ۇستاز ءبىلىم بەرەدى. جالپى وڭىردە 27100 وقۋشى بار. وقۋ جىلى قارساڭىندا اۋدان بويىنشا 2700 بالا مەكتەپ تابالدىرىعىن اتتاسا، سونىڭ 11 وقۋشىسى - اققۇدىق اۋىلىنىڭ بۇلدىرشىندەرى.
بۇدان بولەك پانفيلوۆ اۋدانىنداعى شەكارا شەبىندەگى اۋىلداردىڭ مەكتەپتەرى جاڭارتىلىپ جاتىر. باسقۇنشى اۋىلىنا 300 ورىندىق ورتا مەكتەپتىڭ قۇرىلىسىنا 1 ملرد 709،483 ملن تەڭگە بولىنسە، قورعاس اۋىلىنداعى ورتا مەكتەپتى كۇردەلى جوندەۋگە 352 ملن 970 614 تەڭگە قاراجات ءبولىندى. قازىرگى ۋاقىتتا ەكى نىساننىڭ دا قۇرىلىس جۇمىستارى باستالعان.
سونداي-اق، كىشىشىعان اۋىلىنداعى ورتا مەكتەپتىڭ عيماراتىن كۇردەلى جوندەۋدەن وتكىزۋگە جوبالاۋ-سمەتالىق قۇجاتتارىن دايىنداۋعا وبلىستىق بيۋدجەتتەن 15،5 ملن تەڭگە ءبولىنىپ، كونكۋرس جاريالاندى. كەلەر جىلى ەكى مەكتەپكە كۇردەلى جوندەۋ جۇرگىزىلمەك.