قازاقستاندا تەڭدەسى جوق ەرەكشە ادىستەمەنى جوعارى بىلىكتى لوگوپەد-دەفەكتولوگ راۋان بايچينوۆ ازىرلەدى.
وزگەشە ءادىس ويلاپ تاپقان بىلىكتى مامان - سارسەن امانجولوۆ اتىنداعى شقۋ «Dana bala» ۇزدىكسىز جانە ينكليۋزيۆتى ءبىلىم بەرۋ ورتالىعىنىڭ قىزمەتكەرى. عىلىم جانە جوعارى ءبىلىم مينيسترلىگى تاراتقان مالىمەتكە سەنسەك، جاس عالىم اۆتورلىق قۇقىقپەن قورعالاتىن وبەكتىلەرگە قۇقىقتار تىزىلىمىنە مالىمەت ەنگىزۋ جونىندە كۋالىك العان، دەپ حابارلايدى Almaty-akshamy.kz قازاقپاراتقا سىلتەمە جاساپ.
جوبانى دايىنداۋ كەزىندە تىكەلەي عىلىمي كەڭەسشى بولعان - پەداگوگيكا عىلىمدارىنىڭ كانديداتى، ق ر جاك دوسەنتى كۋلچاريا كوككوزيەۆا.
«كوحلەارلى يمپلانتى بار مەكتەپ جاسىنا دەيىنگى قازاق ءتىلدى بالالارداعى داۋىستىڭ ينتوناسيالىق قۇرىلىمدارىن زەرتتەۋ» اتتى عىلىمي جوبا 2018 جىلى باستالعان.
بۇگىنگى تاڭدا 86 بالاعا زەرتتەۋ جۇرگىزىلدى.
ونىڭ جەتەۋى دىبىستار مەن سويلەۋدى قابىلداۋ، دىبىسقا ەلىكتەۋ، ءسوز تىركەستەرى جانە قاراپايىم سويلەمدەر اتتى ءتورت كەزەڭنەن تۇراتىن قايتا وڭالتۋدان وتۋدە.
جوبا اۆتورىنىڭ ايتۋىنشا، ادىستەمە ءۇش جاستان جەتى جاسقا دەيىنگى بالالارعا ارنالعان.
راۋان بايچينوۆ وسى ادىسپەن ەكى جىلدان بەرى وقىتىلىپ جۇرگەن بالالاردىڭ ءبىرى بۇگىندە سويلەم قۇراپ، سويلەپ جۇرگەنىن ايتادى.
تاعى بىرەۋى كوحلەارلى يمپلانت قويعالى دىبىستار مەن داۋىسقا ەلەڭدەمەيتىن بولعان.
ءبىراق ەكى اي بويى ارنايى ادىستەمەمەن ۇيرەتىلگەن بالا دىبىستاردى جاقسى قابىلداپ، جاقسى ەستي باستاعان. دەگەنمەن، ول ءالى قايتا وڭالتۋدىڭ ءۇش كەزەڭىنەن ءوتۋ ءتيىس.
قازىرگى كۇنى بۇل ادىستەمەنى شقو ءبىلىم باسقارماسىنىڭ وبلىستىق پسيحولوگيالىق-مەديسينالىق-پەداگوگيكالىق كەڭەس بەرۋ مەكەمەسى، «الەۋمەتتىك قىزمەتكەرلەر مەن ەرىكتىلەر قاۋىمداستىعى» قوعامدىق ۇيىمى جانە ۋنيۆەرسيتەت بازاسىندا اشىلعان «Dana bala» ۇزدىكسىز جانە ينكليۋزيۆتى ءبىلىم ورتالىعى قىزمەتكەرلەرى قولدانىپ ءجۇر.