پاكىستاندىق اسكەري قىزمەتشىلەر مۇنداي ساپارلارعا وڭىرمەن، اسكەري وقۋ ورىندارىنىڭ تىنىس-تىرشىلىگىمەن تانىسۋ جانە بايلانىس ورناتۋ ماقساتىندا ورتالىق ازيا ەلدەرى بويىنشا جىل سايىنعى تۋر شەڭبەرىندە شىعادى.
شەتەلدىك دەلەگاسيانىڭ باسشىسى اسكەري كوللەدج كافەدراسىنىڭ باستىعى بريگادالىق گەنەرال ۆاسيم كۋاسير مۇنداي كەزدەسۋلەر تانىمدىق جانە پراكتيكالىق تۇرعىدان پايدالى ءارى كۋرسانتتارعا تاجىريبە مەن ءبىلىم الماسۋ مۇمكىندىگى دەپ سانايدى، دەپ حابارلايدى Almaty-akshamy.kz قورعانىس مينيسترلىگىنە سىلتەمە جاساپ.
پاكىستاندىق كۋرسانتتار ق ر قورعانىس مينيسترلىگىنىڭ ساعادات نۇرماعامبەتوۆ اتىنداعى اسكەري كوللەدجىندە تۇرىپ، ارنايى دايارلىق سىنىپتارىن، ۇلاندار ۇيرەنەتىن قارۋ-جاراق پەن اسكەري تەحنيكانى تاماشالادى.
قوناقتار سونىمەن قوسا كەڭەس وداعىنىڭ باتىرى، حالىق قاھارمانى ارميا گەنەرالى ساعادات نۇرماعامبەتوۆ اتىنداعى كىتاپحاناعا، مۇراجايعا، باردى. بۇل رەتتە ولار ۆولەيبول، شاحمات جانە ۇستەل تەننيسى سياقتى سپورت تۇرلەرىندە قازاقستاندىق قۇرداستارىمەن باسەكەلەسۋ مۇمكىندىگىن دە جىبەرگەن جوق.
پاكىستاننان كەلگەن دەلەگاسيا مۇشەلەرى ۇلتتىق اسكەري-پاتريوتتىق ورتالىعىنا بارىپ، قازاقستان قارۋلى كۇشتەرى مەملەكەتتىك اسكەري-تاريحي مۋزەيىنىڭ زالدارىنا ەكسكۋرسيا جاسادى.
بۇل ساپار جايلى كۋرسانتتاردىڭ ەلوردانىڭ كورىكتى جەرلەرىندە تۇسكەن فوتولارى مەن قازاقستاننىڭ رامىزدەرى بار كادەسىيلار ەسكە ءتۇسىرىپ تۇراتىن بولادى.