الماتى وبلىسى اگرارلىق-يندۋستريالدى ايماق بولعاندىقتان، وڭدەۋشى سەكتورعا، ونىڭ ىشىندە اۋىل شارۋاشىلىعى ونىمدەرىن قايتا وڭدەۋگە باسىمدىق بەرىلەدى. بۇل تۋرالى باسپا ءسوز جيىنىندا وبلىس اكىمى مارات سۇلتانعازييەۆ ءمالىم ەتتى.

«الماتى وبلىسى ەلىمىز بويىنشا قۇس باسىنىڭ سانى مەن قۇس ەتىن وندىرۋدەن كوش باستاپ تۇر. قوي مەن ەشكى سانى جونىنەن جانە جۇگەرى، كوكونىس، جەمىس-جيدەك داقىلدارى مەن كارتوپ وسىرۋدەن رەسپۋبليكادا العاشقى ۇشتىككە كىرەدى. ال بالىق شارۋاشىلىعى تاۋارلى بالىق ءوندىرىسىنىڭ كولەمىن ۇلعايتۋعا جانە يمپورتتى الماستىرۋ ءۇشىن دايىن ءونىم شىعارۋعا باعىتتالىپ وتىر. وتكەن جىلى 5 مىڭ تونناعا جۋىق بالىق ءوندىرىلدى. 2030 جىلعا قاراي بۇل كورسەتكىشتى 17 مىڭ تونناعا جەتكىزۋ جوسپارلانىپ وتىر»، - دەدى وبلىس اكىمى.

ءوڭىر باسشىسىنىڭ سوزىنشە، بيىل اگروونەركاسىپتىك كەشەندى قولداۋعا 34 ملرد تەڭگەدەن استام قاراجات قاراستىرىلعان. بىلتىر اۋىل شارۋاشىلىعىنىڭ جالپى ءونىم كولەمىنىڭ كورسەتكىشى 736،5 ملرد بولسا، وسى جىلى ونىڭ كولەمىن 2،6% وسىممەن 840 ملرد تەڭگەگە دەيىن جەتكىزۋ جوسپارلانىپ وتىر.

«الماتى وبلىسىنىڭ اسىل تۇقىمدى مال شارۋاشىلىعىن دامىتۋ» بىرەگەي وڭىرلىك باعدارلاماسى ازىرلەنىپ، ىسكە اسىرىلۋدا. وعان جەرگىلىكتى بيۋدجەتتەن 6 ملرد تەڭگە قارجى ءبولىنىپ، 820 باس اسىل تۇقىمدى ءىرى قارا جانە 4 مىڭنان استام اسىل تۇقىمدى ۇساق مال ساتىپ الىنعان. وسىلايشا، 2027 جىلعا قاراي ءىرى قارا اسىل تۇقىمدى مال باسىنىڭ ۇلەسىن 19،5%-دان 25%-عا دەيىن، ۇساق مال باسىن 16،7%-دان 20%-عا دەيىن ۇلعايتۋ جوسپارلانۋدا. وسى اتالعان شارالاردىڭ بارلىعى وبلىس حالقىنىڭ ازىق-تۇلىك قاۋىپسىزدىگىن قامتاماسىز ەتۋگە جانە مەگاپوليستىڭ اينالاسىندا ازىق-تۇلىك بەلدەۋىن قۇرۋعا باعىتتالعان»، - دەدى مارات سۇلتانعازييەۆ.

بۇدان بولەك، وڭىردە 157 مىڭ گەكتار جەر مەملەكەتكە قايتارىلعان. وبلىس كولەمىندە سۋارۋ جەلىلەرىن قايتا جاڭارتۋ جۇمىستارى جالعاسۋدا. ناتيجەسىندە 57 مىڭ گەكتارعا جۋىق سۋارمالى جەر قالپىنا كەلتىرىلىپتى.