الماتىداعى ەۋرازيا عىلىمي-زەرتتەۋ ينستيتۋتىندا ءازىربايجان رەسپۋبليكاسى ۇلتتىق ءماجىلىسىنىڭ دەپۋتاتى ءارى مادەنيەت كوميتەتىنىڭ ءتورايىمى گانيرە پاشايەۆامەن كەزدەسۋ ءوتتى.
پروفەسسور، عىلىمي دوكتورى گانيرە پاشايەۆانىڭ ەلىمىزدەگى ۇلتتىق ۋنيۆەرسيتەتتەر مەن مادەني جانە عىلىمي ورتالىقتارعا جاساعان ساپارى گەيدار الييەۆتىڭ 100 جىلدىعىنا وراي وتۋدە. اتالعان كەزدەسۋ تاقىرىبى دا «گەيدار الييەۆتىڭ 100 جىلدىعىندا تۇركى الەمى» دەپ اتالادى.
كەزدەسۋدە گانيرە حانىم ءوز ساپارىنىڭ ماقساتى جانە تۇركى مەملەكەتتەرى اراسىنداعى ءبىلىم مەن مادەنيەت سالاسىنداعى قارىم-قاتىناستارعا، وتكەنى مەن بۇگىنىنە توقتالىپ ءوتتى. سونداي-اق، تۇركى الەمىنىڭ قازىرگى ينتەگراسياسىنا قاتىستى ويلارىمەن ءبولىستى.
«قازىرگى تۇركى مەملەكەتتەرىنىڭ ءوزارا ينتەگراسيالىق بايلانىستارىنىڭ دامۋى مەملەكەت باسشىلارىنىڭ ساياسي ەرىك-جىگەرلەرىنە تىكەلەي بايلانىستى»، – دەدى گەنيرە حانىم.
شاراعا سوڭىندا قاتىسۋشىلارعا گانيرە پاشايەۆا قازاق تىلىندە جارىق كورگەن جىر جيناعىن تارتۋ ەتتى.