بۇل تۋرالى بۇدان بۇرىن حابارلاعانبىز.
دەنساۋلىق ساقتاۋ مينيسترلىگى الماتىنىڭ ورتالىق قالالىق كلينيكاسىندا ايتۆ (ۆيچ) جۇقتىرۋ فاكتىسى بويىنشا ەپيدەميولوگيالىق تەكسەرىس باستادى، دەپ حابارلايدى Almaty-akshamy.kz ۆەدومستۆونىڭ باسپا ءسوز قىزمەتىنە سىلتەمە جاساپ.
"وسى فاكتى بويىنشا دسم سانيتارلىق-ەپيدەميولوگيالىق باقىلاۋ جانە مەديسينالىق جانە فارماسيەۆتيكالىق باقىلاۋ كوميتەتتەرى تەكسەرىس باستادى. كوميسسيانىڭ قۇرامىنا مينيسترلىكتىڭ قازاق دەرماتولوگيا جانە ينفەكسيالىق اۋرۋلار عىلىمي ورتالىعىنىڭ ماماندارى تارتىلدى"، - دەلىنگەن دەنساۋلىق ساقتاۋ مينيسترلىگىنىڭ حابارلاماسىندا.
قوسىمشا اقپارات كوميسسيا جۇمىسىنىڭ قورىتىندىسى بويىنشا بەرىلەدى.
بۇعان دەيىن جيتس ورتالىعىنىڭ ماماندارى الماتىداعى ورتالىق قالالىق كلينيكالىق اۋرۋحاناسىندا ەم قابىلداعان ادامداردىڭ اراسىندا ايتۆ-وڭ مارتەبەسى بار ءۇش جاعدايدى انىقتاعانى حابارلانعان بولاتىن.
وسىعان قاتىستى شۇعىل كوميسسيا قۇرىلدى. كوميسسيا ايتۆ-ينفەكسياسىنىڭ بەرىلۋ كوزدەرىن انىقتاۋ بويىنشا ىشكى تەرگەۋ جۇرگىزىپ، دونورلار، مەديسينا قىزمەتكەرلەرى جانە بايلانىسقان ادامدار تەكسەرىلدى. زەرتتەلگەندەردىڭ بارلىعىندا تەرىس ناتيجە شىقتى.