بەلگىلى ارحەولوگ عالىم ومىردەن وزدى
كورنەكتى عالىم، ارحەولوگيا پروفەسسورى، گەرمانيا ارحەولوگيالىق ينستيتۋتىنىڭ جانە قازاقستان رەسپۋبليكاسى قوعامدىق عىلىمدار اكادەمياسىنىڭ كوررەسپوندەنت مۇشەسى ۆيكتور فەدوروۆيچ زايبەرت 75 جاسىندا دۇنيەدەن ءوتتى، دەپ حابارلايدى Almaty-akshamy.kz 24.kz-كە سىلتەمە جاساپ.
ۆيكتور فەدوروۆيچ 1947 جىلى سولتۇستىك قازاقستان وبلىسىندا دۇنيەگە كەلگەن. پەتروپاۆل پەداگوگيكالىق ينستيتۋتىنىڭ تاريح فاكۋلتەتىن («تاريح ءمۇعالىمى» ماماندىعى بويىنشا) بىتىرگەن. ەڭبەك جولىن سولتۇستىك قازاقستان وبلىستىق تاريحي-ولكەتانۋ مۋزەيىندە باستاعان. ءار جىلدار ىشىندە ول ارحەولوگيالىق كوللەكسيالاردى قالپىنا كەلتىرۋشى، عىلىمي قىزمەتكەر، مۋزەيدىڭ ارحەولوگيا ءبولىمىنىڭ مەڭگەرۋشىسى بولدى.
عالىمنىڭ قاجىرلى دا تىنىمسىز ەڭبەگىنىڭ ارقاسىندا بۇگىندە سولتۇستىك قازاقستان تاريحي-ولكەتانۋ مۋزەيىندە ەجەلگى بوتاي قونىسىنان تابىلعان ەكى ءجۇز مىڭنان استام جادىگەر بار. ۆ.زايبەرت سەنساسيالىق جاڭالىق اشتى: عالامشارداعى العاشقى جىلقى قازاقستان اۋماعىندا قولعا ۇيرەتىلدى. بۇل زەرتتەۋ جىلقىنى قولعا ۇيرەتۋدىڭ بۇرىنعى تەورياسىن تۇبەگەيلى وزگەرتتى.
ۆيكتور زايبەرتتىڭ ەسىمى ارحەولوگيالىق ورتادا تەك ەلىمىزدە عانا ەمەس، سونىمەن قاتار شەتەلدە دە كەڭىنەن تانىمال. ول سولتۇستىك قازاقستاننىڭ ەجەلگى تاريحى بويىنشا 100-دەن استام كىتاپ پەن ماقالالاردىڭ بىرنەشە عىلىمي جاڭالىقتارىنىڭ اۆتورى.
بەلفاست، كەمبريدج، وكسفورد، نيۋكاسل، ەدينبۋرگ ۋنيۆەرسيتەتتەرىندە ءدارىس وقىدى. ءىى دارەجەلى «دوستىق» (2017)، «پاراسات» (2021) وردەندەرىمەن ماراپاتتالعان. عىلىمي-پەداگوگيكالىق جانە باسقارۋ جۇمىستارىن جۇرگىزدى، ءارتۇرلى ينستيتۋتتار مەن عىلىمي ورتالىقتاردا باسشىلىق قىزمەتتەر اتقاردى، سولتۇستىك قازاقستان جانە كوكشەتاۋ ارحەولوگيالىق ەكسپەديسيالارىن باسقاردى. سوڭعى جىلدارى اكادەميك ءال-فارابي اتىنداعى قازاق ۇلتتىق ۋنيۆەرسيتەتىندە «ارحەولوگيا جانە دالا وركەنيەتى» عىلىمي-زەرتتەۋ ينستيتۋتىنىڭ ديرەكتورى بولىپ جۇمىس ىستەدى.
ۆيكتور زايبەرت – ءوزىن تولىعىمەن عىلىمعا ارناعان، ءوزىن «قازاق حالقىنىڭ نەمىس ۇلى» دەپ اتاعان عالىم.