نە بايقادىڭىز؟
شاعىن ماركەتكە كىرسەم، كاسسا الدىندا ءمولدىر سەللوفانمەن قاپتالعان گەورگيي لەنتالارى جاتىر ەكەن. قازاقشا. 9 مامىر دەپ جازىلعان تۇسىندا باسىنا پيلوتكا كيگەن ءبۇلدىرشىننىڭ سۋرەتى تۇر مولدىرەپ.
– بۇل نە، ساتىلا ما؟ – دەپ سۇرادىم ساتۋشى قىزدان.
– ءيا. 360 تەڭگە.
– الىپ جاتىر ما جۇرت؟
– ءيا، مەكتەپ، بالاباقشالار الىپ جاتىر.
ويلانىپ قالدىم. ءبىز ءالى گەورگيي لەنتاسىن تاعىپ ءجۇرمىز بە سوندا؟
بيىل ۇلى جەڭىسكە 78 جىل تولادى. از ۋاقىت ەمەس. ۋاقىت ۋىستا تۇرمايدى، زىرعىپ اعىپ جاتىر. ارداگەر اتالارىمىزدىڭ قاتارى دا كۇننەن كۇنگە سيرەپ بارادى. الماتىنىڭ وزىندە 56 ارداگەر اتا عانا قالىپتى كوزى ءتىرى. ال بىزگە وسىناۋ بەيبىت كۇندى سىيلاعان باتىرلار ەرلىگىن بۇگىنگى ۇرپاق ۇمىتپاۋعا ءتيىس.
ءيا، جىلدا جەڭىس كۇنى كەۋدەمىزگە سول كۇننىڭ بەلگىسى رەتىندە ءبىرازعا دەيىن سارعىلت-قارا جولاقتى گەورگيي لەنتاسىن تاعىپ كەلگەنىمىز راس. بۇل لەنتا رەسەي يمپەرياسىندا حVIII عاسىردان باستاپ اۋليە گەورگيي، گەورگيي كرەستى وردەندەرىندە قولدانىلعان ەكەن. ونىڭ الدىندا رەسەيلىك ماتروستار باس كيىمىندەگى كرەستىڭ ۇستىنە تاققان. كەيىن ۋاقىت وتە بۇل 1945 جىلعى 9 مامىرداعى جەڭىستىڭ سيمۆولىنا اينالىپ شىعا كەلدى. ۇلى جەڭىستى رەسەي وسى سارعىلت-قارا لەنتا ارقىلى تەك ءبىر وزىنە عانا تەلىگىسى كەلەتىندەي. ال سول جەڭىستە ءبىزدىڭ اتالارىمىزدىڭ دا ۇلەسى، قانى، جانى بار! سوندىقتان بولار، بۇل لەنتا قوعامدا ءبىراز داۋ تۋدىرىپ، قارسى شىققاندار از بولماعان. ناتيجەسىندە سارعىلت، قارا ءتۇستى گەورگيي لەنتاسىنىڭ ورنىن باسقان ءوزىمىزدىڭ قازاقى ويۋمەن كومكەرىلگەن، تۋىمىز تۇستەس «جەڭىس» لەنتاسى جاسالدى. بىلتىر الماتى قالاسىنىڭ اكىمدىگى وسىنداي 20 مىڭ «جەڭىس» لەنتاسىن دايىنداپ، قالا تۇرعىندارىنا تاراتقان بولاتىن.
بۇل لەنتا جاي شۇبەرەك ەمەس، ونى اتالارىمىزدىڭ قان مايداندا توگىلگەن قانى مەن جەڭىس ءۇشىن دەپ العا ۇمتىلعاندا تامشىلاعان ماڭداي تەرىنىڭ بەلگىسى ءھام جاس ۇرپاقتىڭ تاريحقا قۇرمەتى دەپ تانۋىمىز كەرەك. ول – ءار ۇلاننىڭ كەۋدەسىندە جەلبىرەپ، ولاردىڭ پاتريوتتىق سەزىمىن وياتۋعا قاۋقارى بار وتانشىلدىقتىڭ ءبىر بەلگىسى! سوندىقتان وزگەنىڭ ەمەس، ءوزىمىزدىڭ جەڭىس لەنتاسىن تاعايىق!