بۇل ماسەلەنى سەناتور اقمارال ءالنازاروۆا دەپۋتاتتىق ساۋالىندا كوتەردى.
ەلىمىزدىڭ وباعا قارسى كۇرەس قىزمەتى سالاسىنداعى ناقتى پروبلەمانى شەشۋگە قاتىستى دەپۋتاتتىق ساۋالىن جاريالادى، دەپ حابارلايدى Almaty-akshamy.kz قازاقپاراتقا سىلتەمە جاساپ.
ونىڭ ايتۋىنشا، قازىرگى كەزدە ەلىمىزدىڭ وباعا قارسى قىزمەتى ماسعۇت ايقىمبايەۆ اتىنداعى اسا ءقاۋىپتى ينفەكسيالار ۇلتتىق عىلىمي ورتالىعىنىڭ قۇرامىندا. بۇل ورتالىقتى وسىعان دەيىن «QazBioPharm» ۇلتتىق حولدينگىنىڭ قۇرامىنا ەنگىزۋ جوسپارلانعان بولاتىن. الايدا، ءدال ءقازىر دەنساۋلىق ساقتاۋ مينيسترلىگى دەڭگەيىندە ورتالىقتى قايتا قۇرۋ، ياعني وباعا قارسى كۇرەس قىزمەتىن جەكە مەملەكەتتىك مەكەمە رەتىندە بولەك شىعارۋ ماسەلەسى قولعا الىنعان.
دەپۋتاتتىڭ پايىمىنشا، قازاقستاندا وبانىڭ سوڭعى جاعدايى 20 جىل بۇرىن تىركەلگەنىنە قاراماستان، كەيىنگى جىلدارى ادامزات بيولوگيالىق الەمدەگى تۇراقسىزدىققا تاپ بولدى. بۇل رەتتە SARS، COVID-19، قۇس تۇماۋى جانە شوشقا تۇماۋى سەكىلدى ىندەت تارادى. سوندىقتان وسى سالاداعى باقىلاۋدى السىرەتۋ جانە ءتيىستى قۇرىلىمدى بولشەكتەۋ ەل حالقى دەنساۋلىعىنا تەرىس اسەر ەتۋى مۇمكىن.
سالا قىزمەتكەرلەرى جالاقى ماسەلەسىن كوتەرىپ وتىر. سەناتوردىڭ ايتۋىنشا، وباعا قارسى قىزمەت سالاسى قىزمەتكەرلەرىنىڭ جالاقىسىنىڭ وسۋىنە قاراماستان، ونىڭ قورىتىندىسى بويىنشا مەديسينالىق جانە مەديسينالىق ەمەس ءبىلىمى بار قىزمەتكەرلەردىڭ اراسىندا جالاقى مولشەرىنە قاتىستى ايتارلىقتاي ايىرماشىلىق پايدا بولدى.
«بيولوگيالىق ماتەريالدى وڭدەۋ جانە زارارسىزداندىرۋ، ءتيىستى سىناق اياسىندا جانۋارلارعا كۇتىم جاساۋ، كۇشتى اسەر ەتەتىن ۋلى پرەپاراتتارمەن جانە دالالىق جاعدايلاردا جۇمىس ىستەۋ كەزىندە بيولوگيالىق تاۋەكەل قاتەرى ءۇشىن قوسىمشا اقى ەسكەرىلمەگەن. سونىڭ ناتيجەسىندە، وباعا قارسى قىزمەت قىزمەتكەرلەرىنىڭ تەك 23%-ى عانا كاسىبي قىزمەتكە بايلانىستى تاۋەكەل ءۇشىن لاۋازىمدىق جالاقىنىڭ 50 پايىزى سوماسىنداعى قوسىمشا اقىمەن قامتىلعان. بۇل جاعداي دايىندالعان كادرلاردىڭ سالادان كەتىپ قالۋىنا سەبەپ بولۋى مۇمكىن. وسى تۇرعىدا بارلىق قىزمەتكەر مەن بيولوگيالىق تاۋەكەل اياسىندا جۇمىس ىستەيتىن ادامدارعا ەرەكشە ەڭبەك جاعدايى ءۇشىن قوسىمشا اقىنى قالپىنا كەلتىرۋ قاجەت»، - دەدى سەناتور پرەمەر-مينيستر ءاليحان سمايىلوۆتىڭ اتىنا جولداعان ساۋالىندا.
اقمارال ءالنازاروۆا ۇكىمەت باسشىسىنا وباعا قارسى كۇرەس قىزمەت سالاسىنداعى قىزمەتكەرلەردىڭ بيولوگيالىق قاۋىپ-قاتەرگە ۇشىراۋى دەڭگەيىن ەسكەرە وتىرىپ، ولاردىڭ جالاقىسى سوماسىن قايتا قاراۋدى سۇرادى.
مۇنىمەن قوسا ول اتالعان قىزمەتتى جەكە مەكەمەگە بولمەي، ونى م.ايقىمبايەۆ اتىنداعى اسا ءقاۋىپتى ينفەكسيالاردىڭ ۇلتتىق عىلىمي ورتالىعى قۇرمىندا قالدىرۋدى ۇسىندى.
ونىڭ پايىمىنشا، بۇل ورتالىقتى «QazBioPharm» حولدينگىنىڭ قۇرامىنا وتكىزۋ جۇمىسىن جەدەلدەتۋ كەرەك.