جاڭا سورعى-كومپرەسسورلىق قۇبىرلاردى جالعان ورناتقان
ماڭعىستاۋ وبلىسىندا «وزەنمۇنايگاز» اق مەن «بەرالي ماڭعىستاۋ Company» جشس-دا ۇرلىق فاكتىلەرى بويىنشا تەرگەۋ ءجۇرىپ جاتىر، دەپ حابارلايدى Almaty-akshamy.kz.
قارجىلىق مونيتورينگ اگەنتتىگىنىڭ مالىمەتىنە سەنسەك، «وزەنمۇنايگاز» اق جانە «بەرالي مانگيستاۋ Company» ج ش س لاۋازىمدى تۇلعالارى اسا ءىرى كولەمدە قاراجات جىمقىردى دەگەن كۇدىككە ىلىنگەن.
جاڭاوزەن تۇرعىندارىنىڭ «قازمۇنايگاز» اق (وزەنمۇنايگاز) جۇيەسىندەگى سىبايلاس جەمقورلىق جانە جىمقىرۋ فاكتىلەرى بويىنشا كوپتەگەن وتىنىشتەرىنىڭ نەگىزىندە قارجىلىق مونيتورينگ اگەنتتىگىنىڭ ماڭعىستاۋ وبلىسى بويىنشا ەكونوميكالىق تەرگەپ-تەكسەرۋ دەپارتامەنتى سوتقا دەيىنگى بىرنەشە تەرگەۋ جۇرگىزىپ جاتىر.
اتاپ ايتقاندا، كاسىپورىننىڭ بۋحگالتەرلىك جانە وزگە دە رەسمي قۇجاتتاماسىندا بۇرمالانعان مالىمەتتەردى كورسەتە وتىرىپ، جاڭا سورعى-كومپرەسسورلىق قۇبىرلاردى جالعان ورناتۋ ارقىلى ۇرلاۋ فاكتىسى بويىنشا «وزەنمۇنايگاز» اق لاۋازىمدى تۇلعالارىنا قاتىستى تەرگەۋ باستالعان.
بۇدان باسقا، «وزەنمۇنايگاز» اق لاۋازىمدى تۇلعالارى مەن «بەرالي ماڭعىستاۋ Company» ج ش س باسشىلىعىنا 2022 جىلى مۇناي ءوندىرۋ ۇڭعىمالارىن جوندەۋ جۇمىسىن ورىنداۋعا ارنالعان اسا ءىرى كولەمدەگى قاراجاتتى جىمقىردى دەگەن ايىپ تاعىلىپ وتىر.
«بەرالي ماڭعىستاۋ Company» ج ش س باسشىسى ءوزىنىڭ جاقىن تۋىستارىمەن ارنايى تەحنيكانى جالعا الۋ جونىندە شارت جاساعانى انىقتالدى. ءىس جۇزىندە 248 ملن تەڭگە كولەمىندە الىنعان قاراجات قولما-قول اقشاعا اينالدىرىلىپ جىمقىرىلعان.
«اتالعان ءىس-قيمىل ارقىلى «بەرالي ماڭعىستاۋ Company» ج ش س باسشىلىعى مەملەكەتكە عانا ەمەس، كومپانيا قىزمەتكەرلەرىنە دە زيان كەلتىرگەنىن اتاپ وتەمىز. قولما-قول اقشا كومپانيانى دامىتۋعا، جۇمىسشىلاردىڭ ەڭبەك جاعدايىن جاقسارتۋعا، سونىڭ ىشىندە جالاقىنى كوتەرۋگە جۇمسالسا بولاتىن ەدى. بۇل جاعداي كومپانيانىڭ قاراپايىم قىزمەتكەرلەرى اراسىندا نارازىلىق تۋدىردى. تەرگەۋ بارىسىندا اتالعان فاكتىلەر تەكسەرىلىپ جاتىر. قپك 201 بابىنا سايكەس وزگە اقپارات جاريا ەتۋگە جاتپايدى»، - دەپ حابارلادى اگەنتتىك.
ەسكە سالا كەتەيىك، 10 ساۋىردە ەنەرگەتيكا مينيسترلىگى عيماراتىنىڭ الدىنا 70-كە جۋىق جاڭاوزەندىك مۇنايشى جينالدى.