«وقيتىن ۇلت» جوباسى
بۇگىن الماتىداعى ۇلتتىق كىتاپحانادا دۇنيەجۇزىلىك كىتاپ جانە اۆتورلىق قۇقىق كۇنىنە ارنالعان جىل سايىنعى «كىتاپ شوۋ-2023» فەستيۆالى ءوتتى، دەپ حابارلايدى Almaty-akshamy.kz.
فەستيۆال تۇركى مەملەكەتتەرىنىڭ ۇيىمى جاريالاعان «2023 جىل - تۇركى وركەنيەتىنىڭ دامۋ جىلى» اياسىندا ۇيىمداستىرىلدى.
فەستيۆالدىڭ ماقساتى – «وقيتىن ۇلت» جوباسى شەڭبەرىندە حالىقتىڭ كىتاپ وقۋ بەلسەندىلىگىن ارتتىرۋ، كىتاپ پەن وقۋعا دەگەن قىزىعۋشىلىعىن قولداۋ، بالالار مەن جاسوسپىرىمدەردىڭ وقۋ ساۋاتتىلىعىن كوتەرۋ جانە كىتاپ وقۋ مادەنيەتىن دامىتۋ، سونداي-اق، تۇركى حالىقتارىنىڭ تاريحي جانە ادەبي مۇراسىن ناسيحاتتاۋ.
مەرەكەلىك ءىس-شارانى قازاقستان رەسپۋبليكاسى ۇلتتىق كىتاپحاناسىنىڭ ديرەكتورى، قازاقستاندىق كىتاپحانالىق وداق ءتورايىمى وسپانوۆا باقىتجامال قايىربەك قىزى قۇتتىقتاۋ سوزبەن اشىپ، «كىتاپ شوۋ-2023» فەستيۆالىنىڭ باستى ماقساتى مەن شارا اياسىنداعى ادەبي تانىمدىق، مادەني شارالارعا توقتالدى.
«كىتاپ شوۋ-2023» مەرەكەسى اياسىندا قازاقستاننىڭ حالىق جازۋشىسى، مەملەكەتتىك سىيلىقتىڭ لاۋرەاتى مۇزافار الىمبايەۆتىڭ 100 جىلدىعىنا ارنالعان «قازاق بالالار ادەبيەتىنىڭ وتكەنى مەن بۇگىنى» اتتى رەسپۋبليكالىق عىلىمي-تەوريالىق كونفەرەنسياسى؛ قىرعىزستاننىڭ حالىق جازۋشىسى، مەملەكەت جانە قوعام قايراتكەرى ش.ايتماتوۆتىڭ 95 جىلدىعىنا ارنالعان «شىڭعىس ايتماتوۆتى وقيمىز» اتتى حالىقارالىق دوڭگەلەك ۇستەل؛ «ABAI» ادەبي-تانىمدىق، انيماسيالىق ەنسيكلوپەدياسىنىڭ تۇساۋكەسەرى جانە كىتاپ اۆتورلارى ر.زايكەنوۆا، ق.قارايەۆامەن كەزدەسۋ؛ تانىمال فرانسۋز فوتوگرافى جان-مارك گودەستىڭ «جاندى كىتاپتار» فوتوكورمەسى جانە شەبەرلىك ساعاتى؛ تانىمال پولياك جازۋشىسى پەتر ۆويسەحوۆسكيمەن ونلاين-كەزدەسۋ؛ «وركەنيەت قايسىسى: كىتاپ نەمەسە ايفون» پىكىر-تالاس الاڭى؛ جانە دە ق ر ۇلتتىق كىتاپحاناسى قورىنان «تۇركى الەمىنىڭ بىرلىگى» اتتى كۇيتاباقتار، كىتاپتار جانە مەرزىمدى باسىلىمدار كورمەسى؛ قازاقستاندىق باسپالاردىڭ كىتاپ ونىمدەرىنىڭ ساۋدا-جارمەڭكەسى؛ «وقى جانە وزگەگە ۇسىن» بۋككروسينگ؛ ۇلتتىق شىعارماشىلىق قولونەرشىلەر جارمەڭكەسى ۇيىمداستىرىلدى.
قوناقتار مەن قاتىسۋشىلارعا شاعىن مەرەكەلىك كونسەرت ۇسىنىلدى، مەليكا شەحريباننىڭ كوركەمدىك جەتەكشىلىگىمەن «يلديزلار» تۇرىك بي توبىنىڭ «ايداچىراك» ءبيى، «ZARA CRACIA» بي توبىنىڭ ءسوليستى سونا كارايەۆا، ازەربايجاندىق «سارى گيالين» بيىمەن كوركەمدىك جەتەكشىسى پيرۆەردييەۆا زارينا ياگۋبوۆنا ونەر كورسەتتى، «مۋراس» قىرعىز ەتنومادەني بىرلەستىگىنىڭ ءانشىسى كەريمبەكوۆا ماريپانىڭ ورىنداۋىندا «كومۋزچۋ» حالىق ءانى، الماتى قالاسىنىڭ «وزبەك ۇلتتىق-مادەني ورتالىعى» قوعامدىق بىرلەستىگىنەن «ليازگي» وزبەك حورەزم بيىمەن مەرەكەلىك شوۋ بالەتى ، قازاقستان رەسپۋبليكاسى ۇلتتىق كىتاپحاناسىنىڭ جاس ماماندارى «شاشۋ ءبيىن» كورسەتتى.