قازاقستاندىق الەكساندر نەدوۆەسوۆ بوسنيا جانە گەرسەگوۆينانىڭ بانيا-لۋكا قالاسىندا ءوتىپ جاتقان ATP 250 ءتۋرنيرىنىڭ فينالىنا شىقتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
قازاقستاندىق تەننيسشى جۇپتىق سىندا پورتۋگاليالىق فرانسيسكو كابرالمەن بىرگە جارتىلاي فينالدا جارىستىڭ 2-راكەتكالارى، بەلگيالىقتار ساندەر جيللە جانە يوران فليگەنمەن شەبەرلىك بايقاستى.
قازاقستاندىق-پورتۋگاليالىق جۇپ ەكى ساعاتقا سوزىلعان تارتىستى باسەكەدە 6:7 (2:7)، 7:6 (7:2)، 10:8 ەسەبىمەن جەڭىسكە جەتتى.
الەكساندر مەن فرانسيسكو فينالدا دودانىڭ 1-راكەتكالارى، ۇلىبريتانيالىق دجەيمي ماررەي جاڭازەلانديالىق مايكل ۆينۋسپەن باس جۇلدەنى ساراپقا سالادى.
بۇل جۇپ جارتىلاي فينالدا تاعى ءبىر قازاقستاندىق اندرەي گولۋبيەۆ پەن ۋكراينالىق دەنيس مولچانوۆتى تىزە بۇكتىردى - 6:3، 7:6 (7:1).
ەسكە سالا كەتەيىك، بۇدان بۇرىن تاعى ءبىر قازاقستاندىق تەننيسشىنىڭ بوسنياداعى جارىستىڭ جارتىلاي فينالىنا شىققانىن جازعان بولاتىنبىز.