تاريحي مۇرانىڭ قۇنى 2،5 ملرد وزبەك سومى
وزبەكستاننىڭ فەرگانا وبلىسىنداعى تاريح جانە مادەنيەت مۇراجايىندا تەڭدەسسىز 70 ەكسپوناتتىڭ جالعان جادىگەرلەرمەن الماستىرىلعانى انىقتالدى. تاريحي مۇرانىڭ قۇنى 2،5 ملرد وزبەك سومى نەمەسە 230 مىڭ دوللارعا باعالانىپ وتىر، دەپ حابارلايدى Almaty-akshamy.kz قازاقپارات-قا سىلتەمە جاساپ.
«ارنايى جۇمىس توبى مۇراجاي قورىن زەرتتەۋ بارىسىندا قۇنى 2،5 ملرد وزبەك سومىن قۇرايتىن تەڭدەسسىز 70 ەكسپوناتتىڭ (56-سى بەينەلەۋ ونەرىنىڭ تۋىندىلارى) جالعان ەكەنىن انىقتادى. سونىمەن قاتار مۇراجايدا تۇرۋى ءتيىس 1 بەينەلەۋ ونەرىنىڭ تۋىندىسى مەن 1 گرافيكالىق شىعارما جوق بولىپ شىقتى»،-دەلىنگەن ۆەدومستۆونىڭ حابارلاماسىندا.
ايتا كەتەرلىگى، 2011 جىلى فەرگانا وبلىسىنىڭ ىشكى ىستەر باسقارماسىنا 21 ەكسپونات تاپسىرعان. 2016 جانە 2020 جىلدار ارالىعىندا ولاردىڭ تەك 14ء-ى عانا قايتارىلعان. قازىرگى تاڭدا فەرگانا وبلىسىنىڭ ىشكى ىستەر باسقارماسىندا مۇنداي قۇندىلىقتاردىڭ جوق ەكەنى انىقتالىپ وتىر.
اگەنتتىك وكىلدەرى سونداي-اق تەكسەرۋ بارىسىندا مۇراجايدى كۇردەلى جوندەۋگە بولىنگەن 3،1 ملرد وزبەك سومىنىڭ 1،4 ملرد سومى ۇرلانعانى انىقتالعانىن حابارلادى.
اتالعان دەرەكتەر بويىنشا قىلمىستىق ءىس قوزعالىپ، تەرگەۋ ءجۇرىپ جاتىر.
بۇعان دەيىن وزبەكستان مۇراجايلارىنان 30 جىلدا 3 مىڭنان استام تەڭدەسسىز مادەني قۇندىلىقتار جوعالعانى حابارلانعان بولاتىن. كەلتىرىلگەن شىعىن كولەمى 4 ترلن سوم نەمەسە 357 ملن دوللاردى قۇرايدى.
مۇراجايدان ۇرلانعان قۇندىلىقتاردىڭ وسىنشاما زور كولەمدە ەكەنىن ەسكەرە وتىرىپ، وزبەكستان پرەزيدەنتى باس پروكۋراتۋرا، تۋريزم جانە مادەني مۇرا مينيسترلىگى باسشىلىق ەتەتىن كوميسسياعا وزبەكستان مۇراجايلارىنداعى جادىگەرلەردىڭ بارلىعىن تۇگەندەپ، جىل سوڭىنا دەيىن ولاردىڭ ەلەكتروندى بازاسىن جاساۋدى تاپسىردى.