مۇندا شامامەن 1 جارىم مىڭعا تارتا كەڭەس جاۋىنگەرى ماڭگىلىك مەكەن تاپقان
سوعىس جىلدارى تاشكەنت گوسپيتالدەرىندە قايتىس بولعان قازاق جاۋىنگەرلەرىنىڭ بەيىتى تابىلدى. 50-گە تارتا مايدانگەردىڭ سۇيەگى وزبەكستان استاناسىنداعى باۋىرلاستار زيراتىندا جاتىر، دەپ حابارلايدى Almaty-akshamy.kz «حابار 24» تەلەارناسىنا سىلتەمە جاساپ.
تاريحي دەرەك تاياۋدا عانا انىقتالدى.
باۋىرلاستار زيراتىنا ادەتتە مۇسىلماندىق نەمەسە حريستياندىق بەلگىلەر قويىلمايدى. سوعىستا شەيىت بولعاندارعا ورتاق ءبىر عانا ەسكەرتكىش بار. ول – جارىن، باۋىرىن جانە بالاسىن جوقتاعان انانىڭ ءمۇسىنى. تاشكەنتتەگى باۋىرلاستار زيراتى وتكەن عاسىردىڭ 70-جىلدارى اشىلدى. مۇندا شامامەن 1 جارىم مىڭعا تارتا كەڭەس جاۋىنگەرى ماڭگىلىك مەكەن تاپقان.
تاشكەنت تۇرعىنى تاتيانا دۋبوۆيك – «تاشپويسك» قوعامدىق ۇيىمىنىڭ جەتەكشىسى. باۋىرلاستار زيراتىندا جەرلەنگەن قازاق جاۋىنگەرلەرى تۋرالى تاريحي دەرەكتى تاۋىپ، جارىققا شىعارىپ وتىر. بۇل جەردە 1 مىڭ 300-دەن استام مارمەر تاس بار، ءاربىرىنىڭ استىندا قىزىل اسكەر سولداتىنىڭ سۇيەگى جاتىر.
«ءبىر كەزدەرى ورتا ازيا بويىنشا اسكەري وكرۋگ سانالعان مەكەمەنىڭ قۇجاتتارىن تاپتىق. سونىڭ ىشىندە سانيتارلىق بولىمدەردىڭ ءارحيۆى جانە گوسپيتالدەردە ەمدەلگەن جاۋىنگەرلەردىڭ ءتىزىمى جازىلعان. وزبەكستان اۋماعىندا ناقتى 49 قازاق سولداتىنىڭ بەيىتى بارىنا كوزىمىز جەتتى. ىزدەۋ، سايكەستەندىرۋ جۇمىستارى ءالى دە جالعاسادى»، - دەيدى «تاشپويسك» قوعامدىق ۇيىمىنىڭ جەتەكشىسى تاتيانا دۋبوۆيك.
زيراتتىڭ جوعارعى جاعىندا اسكەري اتاق پەن شەن يەلەرى، ال تومەنگى تۇستا ساربازدار جەرلەنگەن. سوعىس كەزىندە بۇل ماڭدا اسكەري گوسپيتال جۇمىس ىستەدى. مايدان دالاسىنان جەتكىزىلگەن جاۋىنگەرلەردىڭ كوبى العان اۋىر جاراقاتىنان كوز جۇمدى. بەيىتتە تەمىر گەنەرال سابىر راحىموۆتىڭ ەسكەرتكىشى دە بار. پولشادا قازا تاپقان باتىردىڭ سۇيەگى تاشكەنتكە قايتا جەرلەنگەن.
«ادامداردىڭ ءاتى-جونى دۇرىس جازىلماۋى دا مۇمكىن. سەبەبى 70-جىلدارعا دەيىن قالادا 70-تەن اسا باۋىرلاستار زيراتى بولدى. كەيىن بارلىعى وسىندا كوشىرىلدى. جاۋىنگەرلەر قايتا جەرلەندى»، - دەيدى «تاشپويسك» قوعامدىق ۇيىمىنىڭ جەتەكشىسى تاتيانا دۋبوۆيك.
بەيىتتەگى ءاربىر بەلگى سوعىس قۇرباندارى جايلى دەرەكتى بويىنا بۇگىپ جاتىر. تاسقا قاشالعان جازۋدى ۋاقىت وتە وقۋ قيىنداپ بارادى. دەگەنمەن زيرات اكىمشىلىگى مالىمەتتەردى سيفرلىق فورماتقا كوشىرىپ ۇلگەرگەن. جالپى قازاق جاۋىنگەرلەرىنىڭ تولىققاندى ءتىزىمى استانالىق «اتامنىڭ اماناتى» ۇيىمىندا بار. سوعان ساي كەي قازاقستاندىق وتباسىلار باتىر باباسىنىڭ سۇيەگىن تاۋىپ، ۇرپاق اماناتىن ورىندادى.
«كەزىندە جاراقاتتان قازا تاپقان 49 جاۋىنگەردىڭ ءتىزىمىن بەردى. ءبىز ونى الەۋمەتتىك جەلىگە ورنالاستىردىق. مەركە اۋدانىنان ساۋلە دەگەن تۇرعىنى بىزگە حابارلاستى. ءابدىقادىروۆ ءازىمحان دەگەن كىسى قايىن اتاسىنىڭ ءىنىسى ەكەن. سوعىسقا ءبىر وتباسىنان 4 اعايىن كەتكەن. قايىن اتاسى ورالعان. ءۇش ءىنىسى حابار-وشارسىز كەتكەن. ول كىسى سامارقاندتا جەرلەنىپتى»، - دەيدى «اتامنىڭ اماناتى» قوعامدىق بىرلەستىگىنىڭ قۇرىلتايشىسى ءاليا ساعىمبايەۆا.
وتاندى قورعاۋ جولىنداعى ەرەن ەرلىك ەشقاشان ۇمىتىلمايدى. باۋىرلاستار بەيىتىنە كىرەبەرىستە دە وسىنداي جازۋدى وقىدىق. اۋماق جەرگىلىكتى اكىمدىكتىڭ ارنايى قورعاۋىنا الىنعان. باعباندار كەڭەس جاۋىنگەرلەرى جاتقان جەرگە ەرەكشە كۇتىممەن قارايدى.