مەرەكە قۇرمەتىنە 34 ۇزدىك اسكەري قىزمەتشى مەن ازاماتتىق پەرسونالعا مەملەكەتتىك ناگرادالار تابىس ەتىلدى
اسكەري بولىمدەر مەن مەكەمەلەردىڭ، اسكەري وقۋ ورىندارىنىڭ جەكە قۇرامى ۇلتتىق مەرەكەنى كەڭىنەن اتاپ وتۋدە. 1990 جىلى قازاق كسر جوعارعى كەڭەسى مەملەكەتتىك ەگەمەندىك تۋرالى دەكلاراسيا قابىلدانعان بۇل كۇن ەلىمىزدىڭ باستى مەرەكەسىنە اينالدى، دەپ حابارلايدى Almaty-akshamy.kz.
قورعانىس مينيسترلىگىندە تاريحي كۇننىڭ قۇرمەتىنە وراي سالتاناتتى جينالىس بولىپ ءوتتى. قارۋلى كۇشتەردىڭ جەكە قۇرامى مەن ارداگەرلەرىن قورعانىس ءمينيسترى گەنەرال-پولكوۆنيك رۋسلان جاقسىلىقوۆ قۇتتىقتادى.
– 1990 جىلعى 25 قازان قازاقستان حالقى ءۇشىن اتا-بابا ارمانى ورىندالعان كۇن. بۇل كۇن بولاشاق ۇرپاقتىڭ وركەندەۋىن قامتاماسىز ەتە وتىرىپ، دەربەس ءارى تاۋەلسىز دامۋ جولىن تاڭداعان بەتبۇرىس رەتىندە تاريحتا ماڭگىلىككە قالادى، – دەپ اتاپ ءوتتى قورعانىس ۆەدومستۆوسىنىڭ باسشىسى.
مينيستر قارۋلى كۇشتەردىڭ ەلىمىزدىڭ تىنىشتىعىن ساقتاۋداعى ءرولىن، سونداي-اق ارداگەرلەردىڭ ارميانىڭ جاۋىنگەرلىك قابىلەتىن قالىپتاستىرۋ مەن نىعايتۋداعى ماڭىزدىلىعىن ەرەكشە اتاپ ءوتتى.
– تاۋەلسىزدىك جىلدارىندا قازاقستان ارمياسى مەملەكەتتىڭ ەگەمەندىگى مەن اۋماقتىق تۇتاستىعىن قامتاماسىز ەتىپ قانا قويماي، زاماناۋي، جوعارى جاراقتاندىرىلعان جانە ۇتقىر اسكەرگە اينالدى. بۇل نەگىزىنەن قارۋلى كۇشتەر ارداگەرلەرىنىڭ، سونىڭ ىشىندە وسى زالدا وتىرعان ءبىرقاتار ازاماتتاردىڭ ارقاسى، – دەدى گەنەرال-پولكوۆنيك رۋسلان جاقسىلىقوۆ.
رەسپۋبليكا كۇنىنە وراي پرەزيدەنت جارلىعىمەن قورعانىس ءمينيسترىنىڭ ورىنباسارى مۇحامەدجان تالاسوۆقا «گەنەرال-لەيتەنانت» اسكەري اتاعى، شتاب باستىعى – اۋە شابۋىلىنا قارسى قورعانىس اسكەرلەرى قولباسشىسىنىڭ ءبىرىنشى ورىنباسارى نۇرتاس قاباقوۆقا «گەنەرال-مايور» اسكەري اتاعى بەرىلدى.
مەرەكە قۇرمەتىنە 34 ۇزدىك اسكەري قىزمەتشى مەن ازاماتتىق پەرسونالعا مەملەكەتتىك ناگرادالار تابىس ەتىلدى.
II دارەجەلى «داڭق» وردەنىنە باس شتاب باستىعى – قۇرلىق اسكەرلەرى باس قولباسشىسىنىڭ ءبىرىنشى ورىنباسارى گەنەرال-مايور قانىش ابۋباكىروۆ يە بولدى. II دارەجەلى «ايبىن» وردەنىمەن قورعانىس مينيسترلىگى تاربيە جانە يدەولوگيالىق جۇمىستار دەپارتامەنتى باستىعىنىڭ ورىنباسارى پولكوۆنيك ەرميان بياتوۆ، 78639 اسكەري ءبولىمىنىڭ كومانديرى پولكوۆنيك التىنبەك كەنجەبايەۆ، ينجەنەرلىك اسكەرلەر دەپارتامەنتى باستىعىنىڭ ورىنباسارى پولكوۆنيك قانات ماحمەتوۆ، 27943 اسكەري ءبولىمى كومانديرىنىڭ ورىنباسارى پودپولكوۆنيك باۋىرجان نازىمبەكوۆ، 48386 اسكەري ءبولىمىنىڭ كومانديرى پودپولكوۆنيك مەرگەن نۇربايەۆ، وق-دارىلەر باس باسقارماسىنىڭ باستىعى پولكوۆنيك اندرەي تيحونەنكو ماراپاتتالدى.
«قۇرمەت» وردەنىن قورعانىس مينيسترلىگى زاڭ دەپارتامەنتى باستىعىنىڭ ورىنباسارى ادىلەت مايورى نۇرجان جاپاروۆ، قارۋلى كۇشتەر اسكەري ينفراقۇرىلىم باس باسقارماسى باستىعىنىڭ ورىنباسارى زاپاستاعى پولكوۆنيك باعىت كەرىمبايەۆ؛ اۋە قورعانىسى كۇشتەرى ينجەنەرلىك-اۆياسيالىق قامتاماسىز ەتۋ باس باسقارماسى باستىعىنىڭ ورىنباسارى پولكوۆنيك ارمان ۇمبەتالييەۆ الدى.
سونداي-اق ازاماتتىق جانە اسكەري بورىشىن ۇلگىلى ورىنداعانى ءۇشىن قارۋلى كۇشتەردىڭ ءبىرقاتار اسكەري قىزمەتشىلەرى مەن قىزمەتكەرلەرى «جاۋىنگەرلىك ەرلىگى ءۇشىن»، «ەرلىگى ءۇشىن»، «ەرەن ەڭبەگى ءۇشىن» مەدالدارىمەن، مەملەكەت باسشىسىنىڭ قۇرمەت گراموتالارىمەن «قازاقستاننىڭ ەڭبەك سىڭىرگەن قايراتكەرى» اتاعىمەن ماراپاتتالدى.
قورعانىس ءمينيسترىنىڭ بۇيرىعىمەن قىرىقتان استام وفيسەر مەن سەرجانتقا كەزەكتى اسكەري اتاقتار مەرزىمىنەن بۇرىن بەرىلدى. ەلىمىزدىڭ قورعانىس قابىلەتى مەن اسكەري قاۋىپسىزدىگىن نىعايتۋعا ەلەۋلى ۇلەس قوسقان قىرىق ءتورت اسكەري قىزمەتشىگە «ەل قورعانى» ۆەدومستۆولىق مەدالى تابىستالدى. بۇدان وزگە ءتورت وفيسەرگە «زاڭ سالاسىنىڭ ۇزدىگى» توسبەلگىسى بەرىلدى. قورعانىس ۆەدومستۆوسى باسشىسىنىڭ اتىنان گراموتالار مەن العىس حاتتار تابىس ەتىلدى.
ماراپاتتاۋ ءراسىمى قارۋلى كۇشتەر ۇلتتىق اسكەري-پاتريوتتىق ورتالىعىنىڭ شىعارماشىلىق ۇجىمى دايىنداعان مەرەكەلىك كونسەرتكە جالعاستى.