وزبەكستاننىڭ ورتالىق سايلاۋ كوميسسياسى پرەزيدەنتتىك سايلاۋ الدىنداعى باسەكەگە قاتىساتىن ءتورت ۇمىتكەردى تىركەدى، دەپ حابارلايدى Almaty-akshamy.kz.
Gazeta.uz سايتىنىڭ حابارلاۋىنشا، شاۆكات ميرزيويەۆ ليبەرالدىق-دەموكراتيالىق پارتيادان، حالىقتىق-دەموكراتيالىق پارتيادان - ۇلىقبەك ينوياتوۆ، «ادولات» سوسيال-دەموكراتيالىق پارتياسىنان - روباحون ماحمۋدوۆا جانە ەكولوگيالىق پارتيادان - ابدۋشۋكۋر حامزايەۆ تىركەلگەن، دەپ جازدى kz.kursiv.media.
ءوز كەزەگىندە «ميلليي تيكلانيش» پارتياسى ءوز كانديداتۋراسىن ۇسىنباي، قازىرگى پرەزيدەنت شاۆكات ميرزيويەۆتىڭ كانديداتۋراسىن قولدادى.
سايلاۋ ناۋقانى 7 ماۋسىمدا باستالادى. سايلاۋ 2023 جىلدىڭ 9 شىلدەسىنە بەلگىلەنگەن.
ەسكە سالايىق، مامىر ايىنىڭ باسىندا وزبەكستان مەملەكەت باسشىسىنا كەزەكتەن تىس پرەزيدەنت سايلاۋىن جاريالاۋعا مۇمكىندىك بەرەتىن كونستيتۋسيالىق زاڭ قابىلداعان بولاتىن.
شاۆكات ميرزيويەۆ 8 مامىردا وليي ماجليس پالاتالارىنىڭ، پارتيالاردىڭ، سوت جانە اتقارۋشى بيلىك ورگاندارىنىڭ باسشىلارىمەن رەفەرەندۋم قورىتىندىسىنا ارنالعان جيىندا كەزەكتەن تىس پرەزيدەنت سايلاۋى وتەتىنىن مالىمدەدى.
بۇدان بۇرىن حابارلانعانداي، وزبەكستاندا ناۋرىز ايىندا وزبەكستان رەسپۋبليكاسىنىڭ كونستيتۋسياسى تۋرالى زاڭ جوباسىندا وزبەكستان پرەزيدەنتىنىڭ وكىلەتتىگىن بەس جىلدان جەتى جىلعا ۇزارتۋ تۋرالى تارماق ەنگىزىلگەن. وزبەكستان كونستيتۋسياسىنىڭ جاڭا رەداكسياسىنا 27 باپ ەنگىزۋ جوسپارلانۋدا. باپتار سانى 128-دەن 155-كە دەيىن وسەدى. وسىلايشا رەسپۋبليكانىڭ نەگىزگى زاڭى 65 پايىزعا جاڭارماق.