الايدا ەلدىڭ دەنساۋلىق ساقتاۋ مينيسترلىگى ارنايى كوميسسيانىڭ قوعامدىق ورىنداردا بەتپەردە كيۋدى جالعاستىرۋدى ۇسىنعانىن اتاپ ءوتتى.
وزبەكستانداعى ارنايى كوميسسيا 1 ناۋرىزدان باستاپ بەتپەردە رەجيمىن جويۋ تۋرالى شەشىم قابىلدادى، دەپ حابارلايدى Almaty-akshamy.kz تاسس اقپارات اگەنتتىگىنە سىلتەمە جاساپ.
بۇل تۋرالى حابارلاعان دەنساۋلىق ساقتاۋ مينيسترلىگىنىڭ باسپا ءسوز قىزمەتىنىڭ اقپاراتىنا سايكەس، ارنايى كوميسسيا 1 ناۋرىزدان باستاپ بەتپەردە رەجيمىن جويۋ تۋرالى شەشىم قابىلداعانىمەن، قوعامدىق ورىنداردا بەتپەردە كيۋدى جالعاستىرا بەرۋدى ۇسىنىپ وتىر.
«پرەمەر-مينيستر ابدوللا اريپوۆ باسقاراتىن كوروناۆيرۋسپەن كۇرەس جونىندەگى رەسپۋبليكالىق كوميسسيا بەتپەردە كيۋ رەجيمىن الىپ تاستاۋ تۋرالى شەشىم قابىلدادى، ءبىراق ازاماتتارعا قوعامدىق ورىنداردا بەتپەردە كيۋدى جالعاستىرۋدى ۇسىندى. سونداي-اق، 2020 جىلدىڭ ناۋرىز ايىندا قابىلدانعان ماسكانى مىندەتتى تۇردە كيۋ تۋرالى شەشىم ەپيدەميولوگيالىق جاعدايدىڭ جاقسارۋىنا بايلانىستى كۇشىن جويدى، ءبىراق ەپيداحۋال ناشارلاعان جاعدايدا قايتادان قابىلدانۋى مۇمكىن»، - دەلىنگەن مينيسترلىك تاراتقان حابارلامادا.
وتكەن جىلدىڭ ءساۋىر ايىندا وزبەكستاندا حالىققا جاپپاي ەكپە سالۋ باستالدى. ول ءۇشىن بريتاندىق-شۆەدتىك AstraZeneca كومپانياسىنىڭ ليسەنزياسى بويىنشا ءۇندىستاندا وندىرىلگەن رەسەيلىك Sputnik V ۆاكسيناسى، قىتايلىق Anhui Zhifei Longcom Biopharmaceutical كومپانياسىنىڭ ۆاكسيناسى جانە امەريكاندىق Moderna جانە Pfizer پرەپاراتتارى قولدانىلدى.
سوڭعى مالىمەتتەر بويىنشا، 35 ميلليون حالقى بار رەسپۋبليكادا ءقازىردىڭ وزىندە ۆاكسينالاۋ ءۇشىن 44 ميلليوننان استام دوزا قولدانىلعان.
وزبەكستاندا بارلىعى 235 740 كوروناۆيرۋس ينفەكسياسى تىركەلگەن، ونىڭ ىشىندە 230 286 (97%) ناۋقاس ساۋىعىپ، 1624 ادام قايتىس بولدى.