ساۋلەتتى ءمۇسىن وزبەكالى جانىبەكوۆتىڭ 90 جىلدىق مەرەيتويىنا وراي اشىلىپ وتىر.
شىمكەنت قالاسىندا ورتالىق ساياباقتا قوعام قايراتكەرى، عالىم-ەتنوگراف وزبەكالى جانىبەكوۆتىڭ ءمۇسىنى ورناتىلدى، دەپ حابارلايدى Almaty-akshamy.kz
ءمۇسىننىڭ اشىلۋ سالتاناتىنا قالا اكىمى مۇرات ايتەنوۆ، قوعام قايراتكەرىنىڭ قىزى جۇلدىز وزبەكالى جانە تاعى باسقا دا زيالى قاۋىم وكىلدەرى قاتىستى.
اكىم عالىم-ەتنوگراف وزبەكالى جانىبەكوۆتىڭ ەڭبەگىن ايتا كەلە، وعان قۇرمەت كورسەتۋ ۇرپاققا پارىز ەكەنىنە توقتالدى.
«حالقىمىزدىڭ ءتول دۇنيەتانىمى، ۇلتتىق ءسالت-داستۇردىڭ تەرەڭ بىلگىرى، ەلىمىزدىڭ مادەنيەتىنە ولشەۋسىز ۇلەس قوسقان ءىرى مەملەكەت قايراتكەرى، عالىم-ەتنوگراف وزبەكالى جانىبەكوۆ - ەل تاريحىندا ويىپ تۇرىپ ورىن العان ەڭبەگى ەرەن بىرەگەي تۇلعا. بارشاڭىزدى مادەني كەڭىستىگىمىز بەن وسىناۋ قۋانىشپەن شىن جۇرەكتەن قۇتتىقتايمىن!» – دەدى شىمكەنت قالاسىنىڭ اكىمى مۇرات ايتەنوۆ.
ءىس-شارا بارىسىندا عالىمنىڭ ومىرىنەن سىر شەرتەتىن دەرەكتى ءفيلمنىڭ تۇساۋى كەسىلدى.