تاڭمەن تالاسا تۇرعان بەردىبەكوۆتەر وتباسى بوستاندىق اۋدانىنىڭ تۇرعىندارى. بۇگىن ولار كوپپەن بىرگە وزدەرىنىڭ تۇرعىلىقتى جەرى بويىنشا №240 سايلاۋ ۋچاسكەسىنە بارىپ داۋىس بەردى.
– بۇگىنگى كۇن قۇددى ءبىر جاڭا ومىرگە، جاڭا كەزەڭگە قادام باستىراتىنداي. كۇندە جاڭبىر جاۋىپ تۇرعان اۋا رايىنىڭ بۇگىن شايداي اشىلىپ، سايلاۋشىلارعا جاعداي جاساپ تۇرعانىن جاقسىلىققا بالادىق. ءبىز بۇگىن وتباسىمىزبەن كەلىپ، ءوز تاڭداۋىمىزدى جاسادىق. ويتكەنى، ەل ومىرىندەگى ماڭىزدى وقيعادا شەشىم قابىلداپ، ۇلەس قوسۋدى مىندەتىمىز دەپ بىلەمىز. ۇلىم مەن قىزىم دا كامەلەتكە تولعان جاستار بولعان سوڭ، وزدەرىنىڭ ازاماتتىق ۇستانىمىن بىلدىرۋگە بىزبەن بىرگە كەلدى. ولاردىڭ وتانىنا، ەلىنە، تۋعان جەرىنە دەگەن سۇيىسپەنشىلىگىنە قاراپ، ءوزىم دە ىشتەي ريزا بولدىم، - دەيدى جانۇيانىڭ وتاعاسى ءابدىجاپپار بەردىبەكوۆ.