زەينەلحان وسپانوۆا – 12 قۇرساق كوتەرىپ، تاربيەلەپ جەتكىزگەن «التىن القا» يەگەرى.
الماتى وبلىسى جاركەنت قالاسىنىڭ تۇرعىنى، 100 جاستاعى زەينەلحان وسپانوۆا رەفەرەندۋمدا داۋىس بەردى، دەپ حابارلايدى Almaty-akshamy.kz
«Jetisu Media» وڭىرلىك كوممۋنيكاسيالار ورتالىعىنىڭ مالىمەتىنشە، عاسىر جاساعان كەيۋانا بارلىق ساياسي ناۋقانداردان قالماي، بەلسەندى تۇردە قاتىسىپ كەلەدى. ول سوڭعى 30 جىلدا بولعان سايلاۋ مەن رەفەرەندۋم ەسىندە قالعانىن جەتكىزدى.
«ۇرپاقتارىم امان بولسىن! ارتىمىزداعى جاستار امان بولسىن! جاركەنتىمىز كوركەيە بەرسىن، جاقسارىپ. قازاقستانىمىزدىڭ جاقسى ءبىر ازاماتتارى بولىپ ءوسسىن! جاستارىمىز امان بولسىن! وسە بەرسىن! قازاعىمىزدىڭ سانىن كوبەيتە بەرسىن»، – دەگەن زەينەلحان وسپانوۆا جاستارعا ءوز باتاسىن بەردى.
كەيۋاناعا العاشقى داۋىس بەرۋشى رەتىندە ەستەلىك سىيلىق تابىستالدى.
سونداي-اق بۇگىن الماتى وبلىسى بويىنشا 1053 رەفەرەندۋم ۋچاسكەسىندە داۋىس بەرۋ ءجۇرىپ جاتىر. وڭىردە داۋىس بەرۋ قۇقىعىنا يە ەلەكتورات سانى 1 ملن 200 مىڭنان اسادى.