الماتى دەنساۋلىق ساقتاۋ مەكەمەلەرىندە ەمدەلۋشىلەر بەلسەندى داۋىس بەرۋدە

داۋىس بەرۋ جوعارى ۇيىمداستىرۋشىلىق دەڭگەيدە وتۋدە.

395-سايلاۋ ۋچاسكەسى ورنالاسقان №5 قالالىق كلينيكالىق اۋرۋحانانىڭ پاسيەنتتەرى العاشقىلاردىڭ ءبىرى بولىپ داۋىس بەردى، دەپ حابارلايدى almaty-akshamy.kz.

سايلاۋ كوميسسياسىنىڭ ءتوراعاسى دانيار اميروۆتىڭ ايتۋىنشا، بۇگىن ۋچاسكەدە ستاسيونارلىق ەمدەلۋدە جۇرگەن 100-دەن استام ادام داۋىس بەرەدى دەپ جوسپارلانۋدا.

«بۇل ءۇشىن بارلىق قاجەتتى جاعدايلار جاسالعان، ناۋقاستاردىڭ ءتىزىمى الدىن الا دايىندالعان، رەفەرەندۋم تۋرالى اقپارات بار. قارت ادامدارعا، جۇرە المايتىن جانە قوزعالۋى قيىن ناۋقاستارعا ارنايى داۋىس بەرۋ جاشىگى ۇيىمداستىرىلعان. بارلىق تالاپتار ساقتالۋدا، ۋچاسكەدە باقىلاۋشىلار بار»، - دەپ اتاپ ءوتتى سايلاۋ كوميسسياسىنىڭ ءتوراعاسى.

«جاس باقىلاۋشى» بىرلەستىگىنىڭ وكىلى جىبەك ايداي قىزى ۋچاسكەنىڭ جۇمىسىن اشۋعا الدىن الا كەلدى. ول رەسپۋبليكالىق رەفەرەندۋم – بۇكىل ەل ءۇشىن ماڭىزدى ساياسي وقيعا، سوندىقتان وعان ەرەكشە نازار اۋدارىلۋدا،  بايقاۋشىلاردىڭ ميسسياسى: داۋىس بەرۋدىڭ زاڭ اياسىندا ءوتۋىن قاداعالاۋ ەكەنىن اتاپ ءوتتى. سونىمەن بىرگە، ەمدەۋ مەكەمەسىندەگى ناۋقاستاردىڭ داۋىس بەرۋى جوعارى ۇيىمداستىرۋشىلىق دەڭگەيدە ءوتىپ جاتقاندىعىن ايتتى.

«داۋىس بەرۋ پروسەسى بەلگىلەنگەن تالاپتارعا سايكەس ءجۇرىپ جاتىر، زاڭ بۇزۋشىلىقتار تىركەلگەن جوق. ەمدەلىپ جاتقان ازاماتتار سايلاۋشىلار تىزىمىنە ەنگىزىلىپ، بەلسەندى تۇردە داۋىس بەرۋدە، بارلىق ۇيىمداستىرۋشىلىق-تەحنيكالىق ماسەلەلەر شەشىلگەن، كوميسسيا زاڭ تالاپتارىن ساقتاپ جۇمىس ىستەۋدە»، - دەدى باقىلاۋشى.