مەملەكەت باسشىسى قاسىم- جومارت توقايەۆ قازاقستان حالقىنا جولداۋىندا بيىلعى جىلدى «جۇمىسشى ماماندىقتارى جىلى» دەپ جاريالادى.
بۇل باستامانى سالا وكىلدەرى جۇمىسشى ماماندىعىنىڭ بەدەلىن ارتتىرىپ قانا قويماي، تەحنيكالىق جانە كاسىپتىك ءبىلىم بەرۋ جۇيەسىنىڭ رەفورماسىنىڭ ىسكە اسۋىنا جاسالىپ وتىرعان قولداۋ دەپ قابىلداپ، وسى ماقساتتى جۇزەگە اسىرۋعا كىرىسكەن ەدى. سونداي جۇيەلى جۇمىستىڭ ءبىرى – قالا كولەمىندە ءوتىپ جاتقان «كاسىپ تاڭداۋ – بۇل ماڭىزدى!» دەپ اتالاتىن كاسىبي باعدارلاۋ جۇمىسى.
قازىرگى تاڭدا الماتى قۇرىلىس-تەحنيكالىق كوللەدجىنىڭ ينجەنەرلىك-پەداگوگيكالىق ۇجىمى مەكتەپ وقۋشىلارىنا ارناپ، شەبەرلىك سىنىپتارى مەن سىناق- تاجىريبەلىك ساباقتارىن وتكىزۋدى قولعا الدى.
ولار وندىرىستىك وقىتۋ شەبەرلەرىمەن شەبەرلىك سىنىپتارىن وتكىزىپ، وقۋشىلارعا ماماندىقتىڭ قىرى مەن سىرىن ۇيرەتىپ جاتىر. ديرەكتوردىڭ وقۋ- وندىرىستىك جۇمىس جونىندەگى ورىنباسارى ەلۆيرا باقتىبايەۆانىڭ ايتۋىنشا، اتالمىش ءىس-شارالاردى وتكىزۋدەگى باستى ماقسات – كاسىبي باعدارلىق جۇمىس بارىسىندا وندىرىستىك وقىتۋ جۇرگىزىلەتىن جابدىقتاردى كورسەتۋ، تاڭدالعان كاسىپتىڭ بولاشاعىنا كوز جەتكىزىپ، ءوز الەۋەتىن اشۋ مۇمكىندىگىن سىنعا سالۋ بولىپ وتىر.
سونىمەن قاتار، كوللەدجدە ءوتىپ جاتقان ءىس-شاراعا مەكتەپ وقۋشىلارى مەن مۇعالىمدەرى، اتا-انالار دا قاتىسىپ جاتىر. وقۋشىلار كوللەدجدىڭ ماماندىقتارى مەن بىلىكتىلىكتەرى تۋرالى وزەكتى مالىمەتتەردى الادى، ستۋدەنتتەر وندىرىستىك وقىتۋ جۇرگىزىلەتىن جابدىقتارمەن تانىسادى.
ءىس-شارانىڭ ماڭىزدىلىعىنا كەلسەك، بۇل وقۋشىلار ءۇشىن بولاشاق ماماندىقتى تاڭداۋدا جاۋاپتى قادام بولماق.