ارمەنيانىڭ قازاقستانداعى توتەنشە جانە وكىلەتتى ەلشىسى ارمەن گيەۆونديان فرانكوفونيا كوكتەمىنىڭ 15-ماۋسىمى مادەني-گۋمانيتارلىق سيپاتتاعى كەزەكتى وقيعا ەمەس ەكەندىگىن، قازاقستاندا جىل سايىن فرانسۋز ءتىلى مەن مادەني الۋاندىعىن ىلگەرىلەتۋ، ءبىلىم بەرۋ مەن قايتا دايارلاۋدى ىنتالاندىرۋ، مادەنيەتتەر مەن وركەنيەتتەر ديالوگىن جانداندىرۋ توڭىرەگىندە ەلدەر مەن حالىقتاردى بىرىكتىرۋگە، ىنتىماقتاستىقتى نىعايتۋعا باعىتتالعان ءىس-شارالار وتكىزىلەتىنىن اتاپ ءوتتى.
«فرانكوفونيا – بۇل حالىقتارعا مادەنيەتتى تەرەڭىرەك قابىلداۋعا مۇمكىندىك بەرەتىن، سول ارقىلى مەملەكەتارالىق ىنتىماقتاستىق پاليتراسىن بايىتاتىن مادەنيەتتەر، داستۇرلەر، ەرەكشە ادەت-عۇرىپتاردىڭ تىعىز توعىسۋى. سوڭعى جىلدارى ارمەنيا مەن حالىقارالىق فرانكوفونيا ۇيىمى اراسىنداعى ىنتىماقتاستىق جاڭا سەرپىن الدى، بۇل ۇيىمنىڭ وتكەن 2024 جىلعى سامميتىندە دە ايتىلدى. ارمەنيادا فرانكوفونيانىڭ ونىنشى سپورتتىق جانە مادەني ويىندارىنا دايىندىق ءجۇرىپ جاتىر، ونى 2027 جىلى 23 شىلدەدەن 1 تامىزعا دەيىن ەريەۆاندا وتكىزۋ جوسپارلانعان. بۇل وراسان زور وقيعا فرانكوفونيا ەلدەرىمەن دوستىق قارىم-قاتىناستى نىعايتىپ قانا قويماي، ارمەنيادا فرانسۋز ءتىلىنىڭ تارالۋىنا ەلەۋلى ۇلەس قوسۋ ءۇشىن ۇيىمداستىرىلماق»، – دەدى ارمەنيا ەلشىسى.
ارمەن گيەۆوندياننىڭ ايتۋىنشا، بيىل قازاقستاننىڭ ءتورت قالاسىندا – استانا، الماتى، قاراعاندى جانە شىمكەنتتە كورنەكتى ارميان رەجيسسەرى سەرج اۆەديكياننىڭ «كۇتكەن ادام» ءفيلمىنىڭ كورسەتىلىمى ۇيىمداستىرىلادى.
بەلگيانىڭ قازاقستانداعى توتەنشە جانە وكىلەتتى ەلشىسىنىڭ ورىنباسارى انتۋان بينامە فەستيۆال اياسىندا قازاقستاندىق قالالاردا وتكىزىلىپ جاتقان ءىس-شارالار تۋرالى دا ايتتى. ول بيىل بەلگيا ەلشىلىگى قازاقستانداعى فرانكوفونيا كۇنىنە قۋانا قاتىساتىنىن اتاپ ءوتتى. ءىس-شارالار فرانكوفوندىق كينو اپتالىعى اياسىندا وتەدى.
«ءبىز بەلگيالىق فيلمدەردىڭ كورسەتىلىمدەرىن ۇيىمداستىرىپ جاتىرمىز. استانا مەن الماتىدا «ومەن» ءفيلمى كورسەتىلەدى. قاراعاندىدا «جيۋلي نەگە ۇندەمەيدى» ءفيلمىن كورسەتەمىز. 18 ساۋىردە الماتىدا قازاق جانە فرانسۋز تىلىندەگى ادەبيەتكە ارنالعان ءىس-شارا وتەدى. بەلگيالىق اۆتورلار مەن يلليۋستراتورلار ەلەن دەلفورج كەنتەن گرەبان ونلاين رەجيمىندە يلليۋستراسيالانعان كىتاپتار جاساۋ تاجىريبەلەرىمەن بولىسەدى. وسى ءىس-شارا اياسىندا قاراعاندىدا «كوميكستەر ارقىلى بەلگيا بويىنشا ساياحات» كورمەسىن تاماشالايسىزدار. سونداي-اق «اناشىم» اتتى كىتاپتى قازاق تىلىندە ۇسىنامىز»، – دەدى انتۋان بينامە.
ليتۆا رەسپۋبليكاسىنىڭ قازاقستانداعى توتەنشە جانە وكىلەتتى ەلشىسى ەگيديۋس ناۆيكاس ليتۆا 1999 جىلدان بەرى حالىقارالىق فرانكوفونيا ۇيىمىنىڭ باقىلاۋشى مۇشەسى بولىپ تابىلاتىنىن اتاپ ءوتتى. فرانسۋز ءتىلى - ليتۆادا ەڭ كوپ تارالعان ءتورتىنشى ءتىل. ەلدە فرانسيامەن مادەني ىنتىماقتاستىقتىڭ جوعارى دەڭگەيى بايقالادى.
«مەن ءۇشىن وسىندا جانە بۇعان دەيىنگى قىزمەتتەرىمدە ەلشى بولا وتىرىپ، «فرانكوفونيا كوكتەمىنە» قاتىسۋ ءارقاشان مارتەبە بولدى. مەن سىزدەردى ءىس-شارالارعا قاتىسۋعا، فيلمدەر كورۋگە، گاسترونوميالىق ءىس-شارالارعا قاتىسۋعا شاقىرعىم كەلەدى. سىزدەر كوپتەگەن قىزىقتى جانە جاعىمدى دۇنيەلەرمەن تانىساسىزدار»، – دەدى ول.