الماتى قالاسىنداعى 28 گۆاردياشى-پانفيلوۆشىلار اتىنداعى ساياباقتا ورنالاسقان داڭق مەموريالى ۇلى جەڭىستىڭ 80 جىلدىعىنا وراي اۋقىمدى جاڭارتۋ جۇمىستارىنان وتۋدە. بۇل تۋرالى Aqshamnews.kz سايتى حابارلايدى. ەسكەرتكىش كەشەنى العاش رەت 1975 جىلى 8 مامىردا، جەڭىستىڭ 30 جىلدىعىنا وراي اشىلعان بولاتىن. سودان بەرى بۇل نىسان قالانىڭ ەڭ ماڭىزدى تاريحي-رۋحاني ورىندارىنىڭ بىرىنە اينالدى.
50 جىلدىق ەسكەرتكىش – كۇردەلى جوندەۋدەن وتۋدە
ۋاقىت وتە كەلە مەموريالدىڭ گرانيت تاقتالارى، برۋسچاتكاسى جانە بەتون نەگىزى ايتارلىقتاي توزعان. جوندەۋ جۇمىستارى كەزىندە پليتالار الىنىپ، تولىقتاي جاڭادان بەتون قۇيىلىپ، گرانيت بەتتەرى قايتا وڭدەلىپ، جىلتىراتىلعان.
«العاشىندا بۇل جۇمىستى جەڭىل بولادى دەپ ويلادىق. ءبىراق پليتالار كوتەرىلگەن كەزدە بەتوننىڭ قۇمعا اينالعانىن كوردىك. سوندىقتان ءبارىن تولىق جاڭالاۋعا تۋرا كەلدى»، – دەيدى مۋزەي بويەۆوي سلاۆى ديرەكتورى ءارى كەڭەس وداعىنىڭ باتىرى يۆان پانفيلوۆتىڭ نەمەرەسى الۋا بايكاداموۆا.
تاريحي كەلبەت تولىق ساقتالدى
جاڭارتۋ جۇمىستارى كەزىندە داڭق مەموريالىنىڭ تاريحي ءارى ساۋلەتتىك كەلبەتى ساقتالىپ، بۇرىنعى بەينەسى بۇزىلعان جوق. الۋا بايكاداموۆا بۇل ورىننىڭ تاريحي ماڭىزىن ەرەكشە اتاپ ءوتتى:
«بۇل جەرگە جىل سايىن مىڭداعان ادامدار كەلەدى. قۋانتاتىنى – جاستاردىڭ دا قاتارى ارتىپ كەلەدى. ولار ءوز اتا-بابالارىنىڭ سۋرەتتەرىن ۇستاپ كەلىپ، تاعزىم ەتەدى»، – دەدى ول.
ۇرپاققا امانات بولار تاريحي نىسان
ساياسي عىلىمدار دوكتورى جومارت سيمتيكوۆتىڭ پىكىرىنشە، داڭق مەموريالى – كەڭەس داۋىرىندە جاسالعان تريپتيح ۇلگىسىندەگى سيرەك ساۋلەت تۋىندىسى. ونىڭ ايتۋىنشا، مۇنداي تاريحي ەسكەرتكىشتەر ۇرپاقتان ۇرپاققا پاتريوتتىق رۋح پەن ەل تاريحىن جەتكىزۋگە سەپ بولماق:
«الماتىلىقتار ءۇشىن بۇل ەسكەرتكىشتىڭ تاريحي كەلبەتى وزگەرمەي ساقتالعانى وتە ماڭىزدى. مۇنداي ورىندار – ۇلتتىڭ جادى»، – دەيدى ساراپشى.
مۋزەي دە جاڭارتىلۋدا
ساياباق اۋماعىنداعى جاۋىنگەرلىك داڭق مۋزەيىندە دە جوندەۋ جۇمىستارى جۇرگىزىلىپ جاتىر. بۇل جەردە كەلۋشىلەر پانفيلوۆ ديۆيزياسىنىڭ ەرلىگى، قازاقستاندىق جاۋىنگەرلەردىڭ مايدانداعى جانقيارلىق كۇرەسى تۋرالى دەرەكتەرمەن تانىسا الادى. ارحيۆتىك قۇجاتتار، فوتوسۋرەتتەر، جەكە زاتتار – بارلىعى بولاشاق ۇرپاققا ەل شەجىرەسىن جەتكىزۋگە قىزمەت ەتەدى. مۋزەيدەگى جوندەۋ جۇمىستارى جاقىن كۇندەرى اياقتالماق.
داڭق مەموريالى – الماتى تۇرعىندارى مەن قوناقتارى ءۇشىن ۇلى وتان سوعىسىنىڭ قاھارماندارىنا دەگەن قۇرمەتتىڭ سيمۆولى. 80 جىلدىق مەرەيتوي قارساڭىندا ەسكەرتكىشتىڭ جاڭعىرۋى – تاريحتى ۇمىتپاۋ، وتكەنگە تاعزىم ەتىپ، بولاشاق ۇرپاققا ۇلگى بولارلىق ءىس.
