بۇگىن 18 تامىز - ەلىمىزدە شەكاراشىلار كۇنى. ياعني، شەكاراشىلاردىڭ كاسىبي مەرەكەسى. وسى كۇنى 1992 جىلى ەلباسىنىڭ جارلىعىمەن ەلىمىزدە شىعىس شەكارالىق وكرۋگىنىڭ بازاسىندا شەكارا اسكەرلەرى قۇرىلعان بولاتىن، دەپ حابارلايدى Almaty-akshamy.kz.
وسىلايشا بيىل ق ر ۇقك شەكارا قىزمەتىنىڭ قۇرىلعانىنا تابانى كۇرەكتەي 31 جىل تولىپ وتىر. سودان بەرى وزىنە جۇكتەلگەن جاۋاپتى مىندەتتى ابىرويلى اتقارىپ جۇرگەن شەكاراشىلار ءوز قىزمەتتەرىنە ءمىن تۇسىرگەن ەمەس.
ءداستۇر بويىنشا، اتالمىش مەرەكەنى ق ر ۇقك شەكارا اكادەمياسىنىڭ جەكە قۇرامى وقۋعا ەندى عانا تۇسكەن كۋرسانتتارعا اسكەري انت قابىلداۋ راسىمىنەن باستادى. بۇل جولى بيىل عانا رەسەي فەدەراسياسىنىڭ اسكەري جوعارى وقۋ ورىندارىنا جولداما العان 30-دان استام كۋرسانت وتان الدىندا اسكەري انت قابىلدادى. شەكاراشىلار كۇنىنە تۇسپا-تۇس كەلگەن مەرەكەگە بولاشاق شەكاراشى وفيسەرلەردىڭ اتا-انالارى مەن تۋعان-تۋىستارى قاتىستى.
سالتاناتتى راسىمدە اكادەميا باستىعىنىڭ مىندەتىن ۋاقىتشا اتقارۋشى پولكوۆنيك ا.يسمايلوۆ: «قايىرلى كۇن، قۇرمەتتى وفيسەرلەر جانە ارىپتەستەر مەن كۋرسانتتار! بۇگىن اكادەميانىڭ پلاسىندا تۇرعان ءبىرىنشى كۋرس كۋرسانتتارىنىڭ ومىرىندەگى جارقىن جانە ۇمىتىلماس كۇن. سىزدەر بۇگىن وتان الدىندا اسكەري انت بەردىڭىزدەر. رەسەي فەدەراسياسى مەن تۇركيا رەسپۋبليكاسىنىڭ جوعارى اسكەري وقۋ ورىندارىندا وقىعان جىلدارىڭىزبەن وتكىزگەن التىنداي ۋاقىتتارىڭىز سىزدەر ءۇشىن ەلىمىزدىڭ بەت-بەينەسى عانا بولىپ قانا قويماي، تابىستى كاسىبي قىزمەتىڭىزدىڭ كەپىلى بولاتىنىنا سەنىمدىمىن. اسكەري انت - بۇل جاي عانا رەسمي ءىس-شارا ەمەس، انتقا ءومىر بويى ادال بولۋعا بەرىلگەن سەرت. بۇگىننەن باستاپ ومىرلەرىڭىزدە جاڭا كەزەڭ باستالادى. ايتىپ وتىرعان انتىڭىز سىزدەرگە ۇلكەن جاۋاپكەرشىلىك جۇكتەيدى، جانىڭىزدى اياماي وتاندى قورعاۋعا مىندەتتەيدى. شەكارا اسىپ شەتەلدە وقۋ، ءبىلىم الۋ سىزگە ۇلكەن جاۋاپكەرشىلىك بولىپ تابىلادى. ويتكەنى، سىزدەر شەتەلدەگى ەلىمىزدىڭ وكىلىسىزدەر. ءسىز ءوزىڭىزدىڭ كاسىبي قىزمەتىڭىزگە قاجەتتى ءبىلىم مەن جاقسى داعدىلاردى الاسىز دەپ ۇمىتتەنەمىن»، - دەدى.
ال اتا-انالار اتىنان ءسوز العان كۋرسانت ا.احمۋللايەۆتىڭ اناسى ا.ابدرامموۆا انالىق اقىل كەڭەسىن ايتىپ، ءساتى ءتۇسىپ وقۋعا اتتانايىن دەپ وتىرعان بارشا كۋرسانتتاردىڭ الداعى قىزمەتىنە ساتتىلىك تىلەدى.
ءوز كەزەگىندە كۋرسانتتار اتىنان ءسوز العان م.نۇربولات بارشا قارۋلاستارىن وتان الدىندا بەرگەن اسكەري انتقا ادال بولۋعا شاقىردى. اسكەري انتتىڭ ازاماتقا ءبىر اق رەت قانا بەرىلەتىن قايتالانباس ماڭىزدىلىعىنا توقتالدى.
بۇل جىلى رەسەي فەدەراسياسىنىڭ اسكەري وقۋ ورىندارىنان بولەك، تۇڭعىش رەت تۇركيا رەسپۋبليكاسىنا 6 كۋرسانت اتتانعالى وتىر. ولار ستامبۋلدىڭ اسكەري تەڭىز اكادەمياسىنا جانە انكارا قالاسىنداعى «كارا حارپ وكۋلۋ» قۇرلىق اسكەرلەرىنىڭ اسكەري ۋچيليششەسىنە بارادى. بۇل جىلى وقۋعا تۇسكەن قازاقستاندىق شەكاراشىلاردىڭ اراسىندا قىزدار جوق ەكەن. ايتپەسە، جىل سايىن جوق دەگەن دە ءبىر بويجەتكەن رەسەيدىڭ سانكت- پەتەربۋرگ قالاسىندا ورنالاسقان اسكەري مەديسينا اكادەمياسىنا اتتاناتىن.