الماتىدا «ورتالىق ازيا – جۇڭگو» فورماتىنداعى سىرتقى ىستەر مينيسترلەرىنىڭ 6-شى كەزدەسۋى ءوتتى.
وعان قازاقستان سىرتقى ىستەر ءمينيسترى مۇرات نۇرتىلەۋ، جۇڭگو سىرتقى ىستەر ءمينيسترى ۆان ي، قىرعىزستان سىرتقى ىستەر ءمينيسترى جەەنبەك كۋلۋبايەۆ، تاجىكستان سىرتقى ىستەر ءمينيسترى سيرودجيددين مۋحريددين، وزبەكستان سىرتقى ىستەر ءمينيسترى ءباحتيور سايدوۆ جانە تۇرىكمەنستان وكىلى قاتىستى.
كەزدەسۋدە ساياسي ديالوگتى نىعايتۋ، ساۋدا-ەكونوميكالىق بايلانىستاردى كەڭەيتۋ، ءوزارا كولىك بايلانىستى دامىتۋ ماسەلەلەرى قارالدى. سونداي-اق، سىن-تەگەۋرىندەر مەن قاۋىپ-قاتەرلەرمەن بىرلەسكەن كۇرەس، وڭىردەگى ورنىقتى دامۋ جانە ەكولوگيالىق قاۋىپسىزدىك ماسەلەلەرىنە باستى نازار اۋدارىلدى. ورتالىق ازيانىڭ قىتايمەن ءوزارا سىيلاستىق پەن تەڭدىك قاعيداتتارىندا كوپجاقتى ءوزارا ءىس-قيمىلىنىڭ ارحيتەكتۋراسىن جاقسارتۋ بويىنشا ۇسىنىستار تالقىلاندى.
تاراپتار قازىرگى زامانعى سىن-تەگەۋرىندەرگە ۇيلەستىرىلگەن ورتاق كوزقاراستاردىڭ قاجەتتىلىگىن اتاپ ءوتىپ، ءوزارا ءتيىمدى دامۋ جولىنداعى قادامداردى كەلىستى.
قازاقستان ءسىم باسشىسى ءوز سوزىندە وڭىردەگى تۇراقتىلىقتى قامتاماسىز ەتۋ ءۇشىن نەگىزگى سالالارداعى ىنتىماقتاستىقتى ودان ءارى كەڭەيتۋ قاجەتتىگىنە نازار اۋدارا وتىرىپ، «ورتالىق ازيا – جۇڭگو» كوپجاقتى فورماتىن نىعايتۋدىڭ ماڭىزدىلىعىن اتاپ ءوتتى.
«فورماتىمىزدىڭ «ورتالىق ازيا +» تەتىكتەرى اراسىندا فلاگمانعا اينالۋى، ال كوشباسشىلاردىڭ الداعى كەزدەسۋى ماڭگىلىك دوستىق پەن وركەندەۋدىڭ جاڭا كەزەڭىن اشۋى ءۇشىن بارلىق جاعداي جاسالۋدا» ، – دەپ اتاپ ءوتتى مۇرات نۇرتىلەۋ.
وتىرىسقا قاتىسۋشىلار جاھاندىق سىن-قاتەرلەر جاعدايىندا سىندارلى ديالوگتى جالعاستىرۋدىڭ، بايلانىستاردى دامىتۋدىڭ جانە باسىم باعىتتار بويىنشا كۇش-جىگەردى ۇيلەستىرۋدىڭ ماڭىزدىلىعىنا نازار اۋدارىپ، وسى فورماتتاعى تۇراقتى كەزدەسۋلەرگە دايىن ەكەنىن ءبىلدىردى.
ءىس-شارا قورىتىندىسى بويىنشا سىرتقى ىستەر مينيسترلەرى اقپاراتتىق كومميۋنيكەنى قابىلدادى. وندا «ورتالىق ازيا – جۇڭگو» فورماتى شەڭبەرىندە تاتۋ كورشىلىك، ورنىقتى دامۋ جانە كوپجاقتى ءوزارا ءىس-قيمىلدى تەرەڭدەتۋ قاعيداتتارىنا ورتاق مىندەتتەمە بەكىتىلدى.