جاڭا سالىق جانە بيۋدجەت كودەكستەرى ازىرلەنىپ جاتىر
ق ر پرەمەر-مينيسترى ءاليحان سمايىلوۆتىڭ توراعالىعىمەن وتكەن شەتەلدىك ينۆەستورلار كەڭەسىنىڭ ارالىق وتىرىسىندا كەڭەستىڭ قازاقستانداعى ونەركاسىپ پەن كولىك سالاسىن سيفرلىق ترانسفورماسيالاۋ ماسەلەلەرىنە ارنالعان 35-پلەنارلىق وتىرىسىنا دايىندىق بارىسى، سونداي-اق جۇمىس توپتارىنىڭ ەسەپتەرى قارالدى، دەپ حابارلايدى Almaty-akshamy.kz.
پرەمەر-مينيستر ءوز سوزىندە قازىرگى ۋاقىتتا ۇكىمەت رەتتەۋشىلىك ساياساتتى جەڭىلدەتۋ جانە ەكونوميكانىڭ ناقتى سەكتورىنىڭ ينۆەستيسيالىق تارتىمدىلىعىن ارتتىرۋ بويىنشا بەلسەندى جۇمىس ىستەپ جاتقانىن اتاپ ءوتتى. جاڭا سالىق جانە بيۋدجەت كودەكستەرى ازىرلەنىپ جاتىر، مەملەكەتتىڭ ەكونوميكاعا قاتىسۋ ۇلەسىن ودان ءارى ازايتۋ، دەمونوپوليزاسيالاۋ جانە كولەڭكەلى اينالىمعا قارسى كۇرەس بويىنشا شارالار قابىلدانۋدا.
ۇكىمەت باسشىسىنىڭ ايتۋىنشا، بۇل جالپى رەسپۋبليكانىڭ ينۆەستيسيالىق احۋالىنا وڭ اسەر ەتەدى، ونى ناقتى ساندار راستاپ وتىر:
- 2022 جىلعى 9 ايدىڭ قورىتىندىسى بويىنشا تىكەلەي شەتەلدىك ينۆەستيسيالاردىڭ جالپى كولەمى 18%-عا ءوسىپ، $22 ملرد-تان استى؛
- جالپى وتكەن جىلى شەتەلدىكتەردىڭ قاتىسۋمەن 46 ءىرى ينۆەستيسيالىق جوبا ىسكە قوسىلدى.
سونىمەن قاتار پرەمەر-مينيستر قازاقستان دامۋدىڭ جاڭا كەزەڭىنە اياق باسا وتىرىپ، سيفرلىق ترانسفورماسيالاۋدى قاجەت ەتەتىنىن، وعان ۋاكىلەتتى مەملەكەتتىك ورگاندار تاراپىنان ەرەكشە نازار اۋدارىلاتىنىن ايتتى.