ءقازىر پرواكتيۆتى فورماتتا الەۋمەتتىك-ەڭبەك سالاسىنىڭ 23 مەملەكەتتىك قىزمەتى كورسەتىلەدى.
2022 جىلدىڭ قورىتىندىسى بويىنشا، قازاقستاندىقتارعا پرواكتيۆتى فورماتتا 1،1 ملن ءتۇرلى مەملەكەتتىك قىزمەت كورسەتىلدى، دەپ حابارلايدى Almaty-akshamy.kz ەڭبەك جانە حالىقتى الەۋمەتتىك قورعاۋ مينيسترلىگىنە سىلتەمە جاساپ.
قىزمەت كورسەتۋدىڭ پرواكتيۆتى فورماتى قانداي؟ بۇل كەزدە ادام قانداي دا ءبىر قىزمەتكە جۇگىنبەيدى، ال مەملەكەت ونى ۇيدەن شىقپاي-اق بەلگىلى ءبىر ومىرلىك جاعداي تۋىنداعان كەزدە الۋدى ۇسىنادى. ول ءۇشىن تەك SMS-حابارلاماعا جاۋاپ بەرۋ كەرەك.
پرواكتيۆتى قىزمەتتەر كورسەتۋ كەزىندە قۇجاتتاردى جيناۋدىڭ قاجەتى جوق، بارلىق مالىمەتتەر مەملەكەتتىك دەرەكتەر بازاسىنان ەلەكتروندىق تۇردە الىنادى.
بۇگىنگى تاڭدا پرواكتيۆتى فورماتتا الەۋمەتتىك-ەڭبەك سالاسىنىڭ 23 مەملەكەتتىك قىزمەتى كورسەتىلەدى.
ولاردىڭ ىشىندەگى ەڭ سۇرانىسقا يە بولعاندارى:
- جۇمىسسىزداردى تىركەۋ (347 مىڭ)؛
- بالا تۋۋعا جانە بالا كۇتىمىنە جاردەماقى تاعايىنداۋ (215 مىڭ)؛
- بالا كۇتىمىنە بايلانىستى تابىسىنان ايىرىلعان جاعدايدا الەۋمەتتىك تولەم تاعايىنداۋ (179 مىڭ)؛
- ينفلياسيا دەڭگەيىن ەسكەرە وتىرىپ، ناقتى ەنگىزىلگەن مىندەتتى زەينەتاقى جارنالارىنىڭ، مىندەتتى كاسىپتىك زەينەتاقى جارنالارىنىڭ سوماسى مەن زەينەتاقى جيناقتارىنىڭ سوماسى (مەملەكەتتىك كەپىلدىك) اراسىنداعى ايىرمانى تولەۋ (127 مىڭ)؛
- مۇگەدەكتىكتى جانە/نەمەسە ەڭبەككە قابىلەتتىلىگىنەن ايىرىلۋ دارەجەسىن بەلگىلەۋ جانە/نەمەسە قاجەتتى الەۋمەتتىك قورعاۋ شارالارىن ايقىنداۋ (57 مىڭ).
بۇدان باسقا، ءبىرقاتار باسقا قىزمەتتەردى تۇرلەندىرۋ جانە جەڭىلدەتۋ بويىنشا جۇمىستار جۇرگىزىلۋدە.
بۇرىن دەنساۋلىعىنان ايىرىلعان ازاماتتار مۇگەدەكتىك بەلگىلەۋ كەزىندە، سونداي-اق وڭالتۋدىڭ جاردەماقىلارى مەن تەحنيكالىق قۇرالدارىن الۋ كەزىندە ءتورت ءتۇرلى ينستانسياعا: ەمحاناعا، ءماس بولىمىنە، حقكو-عا جانە اكىمدىككە جۇگىنۋگە ءماجبۇر بولاتىن.
ەندى ءوتىنىش بەرۋشى تەك تۇرعىلىقتى جەرى بويىنشا ەمحاناعا جۇگىنەدى، ال قالعان پروسەستەر اقپاراتتىق جۇيەلەردى ينتەگراسيالاۋ ەسەبىنەن ادام قاتىسۋىنسىز وتەدى.
مۇگەدەكتىك بەلگىلەنگەننەن كەيىن ءوتىنىش بەرۋشىگە وزىنە سەنىپ تاپسىرىلعان تەحنيكالىق وڭالتۋ قۇرالدارى مەن الەۋمەتتىك قىزمەتتەردى پرواكتيۆتى تۇردە الۋ ءۇشىن تەك كەلگەن SMS-حابارلاماعا جاۋاپ بەرۋ قاجەت جانە مۇگەدەكتىگى بار ادامدى وڭالتۋ مەن ابيليتاسيا جەكە باعدارلاماسىنا (واجب) سايكەس وعان قولجەتىمدى بارلىق شارالار اۆتوماتتى تۇردە الەۋمەتتىك قىزمەتتەر پورتالىنا جىبەرىلەتىن بولادى. جىل قورىتىندىسى بويىنشا، 55 مىڭنان استام ازامات وتق جانە الەۋمەتتىك قىزمەتتەردى بەلسەندى تۇردە رەسىمدەدى.
بۇدان باسقا اعىمداعى جىلدىڭ 1 قاڭتارىنان باستاپ، مەملەكەت باسشىسىنىڭ تاپسىرماسىنا سايكەس، وتباسىنىڭ ءال-اۋقاتىن جانە مەملەكەتتىك قولداۋدىڭ ءتيىستى شارالارىن ايقىندايتىن "وتباسىنىڭ سيفرلىق كارتاسى" جۇمىس رەجيمىندە ىسكە قوسىلدى.