ىلگەرىلەۋ قۇرىلىس، اۋىل شارۋاشىلىعى، اقپارات جانە بايلانىس، ساۋدا، كولىك جانە قويمالاۋ، وڭدەۋ ونەركاسىبى سالالارىندا بايقالدى.
ۇلتتىق ەكونوميكا ءمينيسترى الىبەك قۋانتىروۆ بىلتىر قازاقستاننىڭ جالپى ىشكى ءونىمى قانشاعا وسكەنىن مالىمدەدى، دەپ حابارلايدى Almaty-akshamy.kz
«تەرىس سىرتقى فاكتورلارعا قاراماستان، 2022 جىلدىڭ قورىتىندىسى بويىنشا قازاقستان ەكونوميكاسى 3،1% دەڭگەيدە تۇراقتى وسىمگە قول جەتكىزدى. ونىڭ ىشىندە ناقتى سەكتورداعى ءوسىم 3،2%-دى، ال قىزمەت كورسەتۋ سالاسىندا 2،5%-دى قۇرادى»، - دەدى مينيستر.
وڭ ءوسىم قۇرىلىس، اۋىل شارۋاشىلىعى، اقپارات جانە بايلانىس، ساۋدا، كولىك جانە قويمالاۋ، وڭدەۋ ونەركاسىبى سالالارىندا تىركەلگەن. تاۋ-كەن ءوندىرۋ ونەركاسىبىندە وڭدەۋ قارقىنى 1%-عا تومەندەدى. نەگىزگى كاپيتالعا سالىنعان ينۆەستيسيالاردىڭ ءوسۋ قارقىنى 7،8% بولدى.
2022 جىلعى قاڭتار-قاراشادا سىرتقى ساۋدا تاۋار اينالىمى 33،4%-عا ءوسىپ، 122،2 ميلليارد دوللاردى قۇرادى. ونىڭ ىشىندە ەكسپورت بويىنشا كورسەتكىش 42،4%-عا ءوسىپ، 77،6 ميلليارد دوللارعا دەيىن جەتتى. بۇل رەتتە وڭدەلگەن تاۋار ەكسپورتى 33،8%-عا ۇلعايىپ، 24،1 ميلليارد دوللاردى قۇرادى. تاۋار يمپورتى 44،6 ميلليارد دوللارعا تەڭ.
«جالپى، وڭ ساۋدا بالانسى 33،1 ميلليارد دوللاردى قۇراپ وتىر»، - دەدى قۋانتىروۆ.
سونىمەن قاتار، وڭدەۋ ونەركاسىبىندە دە وڭ ءوسىم ساقتالىپ وتىر. ءوندىرىس كولەمى 3،4%-عا ارتقان.