التىن قۇيماعا نەگىزىنەن الماتىلىقتار قىزىعۋشىلىق تانىتقان.
ۇستىمىزدەگى جىلدىڭ قاڭتار ايىندا قازاقستاندىقتار 1700-دەن استام التىن قۇيما ساتىپ العان، دەپ حابارلايدى Almaty-akshamy.kz ۇلتتىق بانكىنىڭ باسپا ءسوز قىزمەتىنە cىلتەمە جاساپ.
ساتىلىپ الىنعان قۇيمالاردىڭ جالپى سالماعى 68،6 كەلىنى قۇرايدى. حالىققا تازارتىلعان التىن قۇيمالاردى ساتۋ جانە ساتىپ الۋ باعدارلاماسىن ۇلتتىق بانك 2017 جىلى ىسكە قوسقان بولاتىن. باعدارلاما قولعا الىنعالى جالپى سالماعى 2،8 تونناعا جۋىق 76 676 قۇيما ساتىلعان.
التىن قۇيمالار بەس ءتۇرلى سالماقتا ۇسىنىلادى: 5، 10، 20، 50 جانە 100 گ. ساتىپ الۋشىلار اراسىندا وتە جوعارى سۇرانىسقا يە ءتۇرى – 10 گرامدىق قۇيما. جالپى ساتىلعان قۇيمالار اراسىندا ونىڭ ۇلەسى – 27%، ياعني، 20 898 دانا. ودان كەيىن 100 گرامدىق قۇيما سۇرانىسقا يە، 16 930 دانا (22%) ساتىلعان، 20 گرامدىق قۇيمادان 14 779 دانا (19%)، 5 گرامدىق قۇيمادان 13 566 دانا (18%)، 50 گرامدىق قۇيمادان 10 503 دانا (14%) ساتىلدى. التىن قۇيمالار الماتى، نۇر-سۇلتان جانە اتىراۋ قالالارىندا كوپ ساتىلادى.
«التىن قۇيمالار سەنىمدى ينۆەستيسيا قۇرالى بولا الادى. التىن قۇيمالار نارىعىنداعى وتىمدىلىكتىڭ باستى كەپىلى – بانك پەن بانكتىك ەمەس ايىرباستاۋ پۋنكتەرى كليەنتكە اقشانى سول كۇنى تولەي وتىرىپ، التىن قۇيمالاردى كەرى ساتىپ الا الادى»، - دەلىنگەن ۇلتتىق بانكىنىڭ باسپا ءسوز قىزمەتىنىڭ حابارلاماسىندا.
باعدارلاما باستالعاننان بەرى ەكىنشى دەڭگەيلى بانكتەر مەن جەكەلەگەن بانكتىك ەمەس پۋنكتەر جالپى سالماعى 275 كەلى 11 292 التىن قۇيمانى كەرى ساتىپ العان، بۇل – جالپى ساتىلعان التىن قۇيمالاردىڭ 15%-ى. ولار كەرى ساتىپ العان التىن قۇيمالاردىڭ بارلىعى دەرلىك ۇلتتىق بانكتىڭ فيليالدارى ارقىلى حالىققا ساتىلادى.
ءاربىر قۇيما قورعاۋ ەلەمەنتتەرىمەن قاپتالعان (قۇيمانىڭ اينا بەتى، ميكروتەكست جانە جيەگى بار) جانە ارنايى قوراپقا سالىنىپ شىعادى، سول ارقىلى قۇيمانىڭ اشىلعان-اشىلماعانىن وڭاي تەكسەرۋگە بولادى. قورعاپ تۇراتىن قوراپ، سونداي-اق ساپا سەرتيفيكاتى بولىپ سانالادى. سوندىقتان، التىن قۇيمانى ۇقىپتى ساقتاپ، قورابىن بۇلدىرمەۋگە كەڭەس بەرەمىز.
ءقازىر التىن قۇيمالاردى Halyk Bank، ەۋرازيالىق بانك، Jusan Bank، سەنتركرەديت بانكى، سونداي-اق جەكەلەگەن بانكتىك ەمەس پۋنكتەردەن ساتىپ الىپ، كەرى ساتۋعا بولادى.