ۇلتتى ستاتيستيكا بيۋروسىنىڭ مالىمەتىنشە، وڭىرلەردە مال باعاسى ءارتۇرلى
سۋ تاسقىنىنان زارداپ شەككەن وڭىرلەردە مال شىعىنى ءۇشىن وتەماقى نارىقتاعى باعا بويىنشا بەرىلەتىنى ايتىلدى. نارىقتا مال باعاسى ءار وڭىردە ءارتۇرلى، دەپ حابارلايدى اlmaty-akshamy.kz.
اۋىل شارۋاشىلىعى مينيسترلىگىنىڭ مالىمەتىنشە، سۋ تاسقىنى بولعان ايماقتاردا 88 مىڭنان استام مال ءقاۋىپسىز جەرگە شىعارىلعان. سونداي-اق سوڭعى دەرەككە سۇيەنسەك، 8،1 مىڭ باس مال سۋعا كەتكەن. ونىڭ ىشىندە ۇساق مال – 6 مىڭ، ءىرى قارا – 1،5 مىڭ، جىلقى باسى – 514. ءقازىر رەسپۋبليكالىق ەپيزووتياعا قارسى وترياد مالدىڭ ولەكسەسىن جويۋمەن اينالىسىپ جاتىر. بۇگىندە 4،1 مىڭ باس مالدىڭ ولەكسەسى جويىلعان. بۇعان قوسا، مينيسترلىك ولگەن مالدىڭ يەلەرىنە وتەماقى تولەۋ الگوريتمى ازىرلەنگەنىن حابارلادى.
«مەنشىك يەلەرى مەن زالالدى انىقتاۋ جانە باسقا دا ماسەلەلەردى شەشۋ ءۇشىن وڭىرلەردە جەرگىلىكتى اتقارۋشى ورگاندارمەن شىعىندى انىقتاۋ جونىندەگى كوميسسيالار قۇرىلدى. سۋ تاسقىنى سالدارىنان قىرىلعان مالداردىڭ يەلەرى مالدارى تۋرالى مالىمەتتەردى كورسەتە وتىرىپ، جەرگىلىكتى كوميسسياعا ءوتىنىش بەرۋى كەرەك. مەنشىك قۇقىعى كوميسسيالاردىڭ اكتىلەرىمەن راستالادى. ال مەنشىك يەلەرىنە وتەماقى ۇلتتىق ستاتيستيكا بيۋروسى جاريالاعان تالاپقا ساي بەرىلەدى»، - دەدى مينيسترلىكتە.
وسىعان وراي، «قازاقستاندا مالدىڭ نارىقتاعى باعاسى قانداي؟» دەگەن سۇراق تۋىندايدى. ۇلتتىق ستاتيستيكا بيۋروسىنىڭ 2024 جىلدىڭ ناۋرىزداعى مالىمەتىنشە، ەلىمىزدەگى اۋىل شارۋاشىلىعى ءونىمىن وندىرۋشىلەردىڭ ورتاشا باعاسى تونناسىنا ءىرى قارا مال ءۇشىن 962 753 تەڭگە، جىلقى – 1 092 296 تەڭگە، تۇيە – 1 061 900 تەڭگە، قوي-ەشكى – 947 454 تەڭگە، ءۇي قۇستارى – 869 016 تەڭگە.
سونداي-اق ۇلتتىق ستاتيستيكا بيۋروسى ءتورت تۇلىكتىڭ جاسىنا قاراي نارىقتاعى باعاسىن دا كورسەتكەن.
ماسەلەن، ساۋىن سيىردىڭ باعاسى 369 656 تەڭگە، سويىلاتىن سيىر قۇنى 374 271 تەڭگەنى قۇراعان. بۇقا باسى 409 972 تەڭگە بولسا، وگىز باسى – 426 767 تەڭگە. ال بۇزاۋدىڭ قۇنى 161 467 تەڭگەنى قۇرايدى.
سونداي-اق دونەن جانە 3 جاستان اسقان جىلقى باسى 531 275 تەڭگە، قۇنان – 388 984 تەڭگە، جاباعى مەن تاي باسى – 267 913 تەڭگە بولىپ بەكىتىلگەن.
تۇيەنىڭ باعاسى كورسەتىلگەن: ىنگەن – 708 442 تەڭگە، بۋرا – 728 639 تەڭگە، بوتا-تايلاق – 422 995 تەڭگە. سونىمەن قاتار ۇسب قوي مەن ەشكىنىڭ نارىقتاعى ورتاشا باعاسىن اتادى. اتاپ ايتقاندا، قوي – 63 001 تەڭگە، قوشقار – 69 312 تەڭگە، توقتى – 46 304 تەڭگە، مارقا – 440 820 تەڭگە، قوزى – 29 581 تەڭگە بولسا، ەشكى – 38 517 تەڭگە، لاق باسى 21 898 تەڭگەنى قۇرايدى.
ايتا كەتەيىك، بۇل رەسپۋبليكا بويىنشا ورتاشا باعا. وڭىرلەردە مال باعاسى ءارتۇرلى. مىسالى، سۋ تاسقىنىنان زارداپ شەككەن اقتوبە وبلىسىندا ساۋىن سيىردىڭ قۇنى 409 354 تەڭگە بولسا، اتىراۋ وبلىسىندا 458 258 تەڭگە، ال باتىس قازاقستان وبلىسىندا 429 607 تەڭگەنى قۇرايدى.