الماتىدا قوعامدىق كولىكتە تاعى جانجال شىقتى.
جولاۋشى اۆتوبۋس جۇرگىزۋشىسىن سوققىعا جىقتى، دەپ حابارلايدى Almaty-akshamy.kz.
قالالىق جول پوليسياسىنىڭ باسپا ءسوز قىزمەتى حابارلاعانداي، بۇگىن ساعات 8:00 شاماسىندا بوستاندىق اۋدانىندا قوعامدىق كولىك ىشىندە تاعى ءبىر جانجال شىقتى.
«98-مارشرۋتتاعى اۆتوبۋستا 38 جاستاعى جولاۋشى قوعامدىق ءتارتىپتى ورەسكەل بۇزىپ، اۆتوبۋس جۇرگىزۋشىسىنە دەنە جاراقاتىن كەلتىرگەن. كۇدىكتى ۇستالىپ، ۋاقىتشا ۇستاۋ يزولياتورىنا قامالدى. قىلمىستىق ءىس قوزعالدى. بۇزاقىلىق فاكتىسى بويىنشا ساراپتاما تاعايىندالدى»، - دەدى بوستاندىق اۋداندىق پوليسيا ءبولىمىنىڭ باستىعى ديدار احانوۆ.
كۇدىكتى سول ساتتە جۇمىسقا كەشىگىپ جاتقانىن ايتىپ، جۇرگىزۋشىدەن اۆتوبۋستى تەزىرەك جۇرگىزۋىن تالاپ ەتكەنى انىقتالدى.