وتباسىنىڭ سيفرلىق كارتاسىن ەنگىزۋدىڭ ناتيجەسىندە 2024 جىل باستالعالى 447،8 مىڭنان استام ادامعا مەملەكەتتىك قىزمەتتەردى پرواكتيۆتى كورسەتۋ ءۇشىن SMS-حابارلاما جولداندى.
بۇل رەتتە ءوتىنىش بەرۋسىز جاردەماقى نەمەسە تولەم الۋ مۇمكىندىگىن 195،6 مىڭ ادام پايدالاندى، دەپ حابارلايدى aqshamnews.kz ەڭبەك جانە حالىقتى الەۋمەتتىك قورعاۋ مينيسترلىگىنە سىلتەمە جاساپ.
وتباسىنىڭ سيفرلىق كارتاسى مەملەكەتتىك ورگانداردىڭ قولدانىستاعى بارلىق اقپاراتتىق جۇيەلەرىنىڭ دەرەكتەرى نەگىزىندە قالىپتاستىرىلادى. بۇگىندە وندا قازاقستاننىڭ 20 ملن ازاماتى نەمەسە 6 ملن-نان استام وتباسى تۋرالى اقپارات جيناقتالعان.
وسك ەنگىزۋدىڭ باستى ماقساتى – قازاقستاندىقتاردىڭ مەملەكەتتىك قولداۋ جۇيەسىنە تەڭ قولجەتىمدىلىگىن قامتاماسىز ەتۋ. وسىعان بايلانىستى ق ر الەۋمەتتىك كودەكسىندە وتباسىنىڭ سيفرلىق كارتاسى الەۋمەتتىك ساياساتتىڭ ورتا جانە ۇزاق مەرزىمدى مىندەتتەرى مەن باعىتتارىن ايقىنداۋ قۇرالى رەتىندە بەلگىلەنگەن. سونداي-اق، وسك ازاماتتاردىڭ الەۋمەتتىك مارتەبەسىنە بايلانىستى كەپىلدەندىرىلگەن مەملەكەتتىك قولداۋدىڭ قانداي دا ءبىر ءتۇرىن الۋعا قۇقىقتارى تۋرالى كۇندەلىكتى «ەلەكتروندىق حابارلاما» بولىپ تابىلادى.
قازىرگى ۋاقىتتا وسك مەملەكەتتىك قولداۋ شارالارىن الۋعا قۇقىعى بار قازاقستاندىقتارعا قانداي دا ءبىر وتىنىشتەرسىز جاردەماقىلار مەن الەۋمەتتىك تولەمدەردىڭ 10 ءتۇرىن رەسىمدەۋگە مۇمكىندىك بەرەدى. ولار ەڭبەك ەتۋ قابىلەتىنەن ايىرىلعان جاعدايدا تولەنەتىن الەۋمەتتىك تولەم؛ جۇمىسىنان ايىرىلعان جاعدايدا تولەنەتىن الەۋمەتتىك تولەم، اسىراۋشىسىنان ايىرىلۋ بويىنشا تولەنەتىن الەۋمەتتىك تولەم نەمەسە جاردەماقى، مۇگەدەكتىگى بار بالانى تاربيەلەپ وتىرعان اتا-اناسىنا (قامقورشىسىنا) جاردەماقى، مۇگەدەكتىگى بويىنشا جاردەماقى، كوپبالالى وتباسىلارعا بەرىلەتىن جاردەماقى، «التىن القا» جانە «كۇمىس القا» القالارىمەن ماراپاتتالعان كوپبالالى انالارعا بەرىلەتىن جاردەماقى، اتاۋلى الەۋمەتتىك كومەك، سونداي-اق جەرلەۋگە ارنالعان ءبىرجولعى تولەم.
سونداي-اق، وسك ارقىلى زەينەتاقى تولەمدەرىن الۋ مۇمكىندىگى، «قانداس» مارتەبەسى بەرىلگەندە نەمەسە ۇزارتىلعاندا مارتەبەنىڭ اياقتالۋ مەرزىمى جانە جۇمىسسىز ادامدار ءۇشىن جۇمىسپەن قامتۋ شارالارى تۋرالى اۆتوماتتى حابارلامالار ىسكە اسىرىلدى.
مەملەكەتتىك قولداۋ شارالارىن الۋعا قۇقىق بەلگىلەنگەن كەزدە الەۋەتتى الۋشىعا 1414 ءبىرىڭعاي بايلانىس ورتالىعىنان SMS-حابارلاما جىبەرىلەدى. حابارلاما العان ازامات وعان كەلىسىمى تۋرالى جاۋاپ بەرۋى كەرەك. ءوتىنىشتى رەسىمدەۋ جانە الەۋمەتتىك جاردەماقى نەمەسە تولەم تاعايىنداۋ اۆتوماتتى رەجيمدە جۇرگىزىلەدى، سودان كەيىن اقشا قاراجاتى الۋشىنىڭ بانك شوتىنا اۋدارىلادى.
الاياقتىق تاۋەكەلىن بولدىرماۋ ماقساتىندا 1414 ءبىرىڭعاي بايلانىس ورتالىعىنان كەلىپ تۇسكەن SMS-كە جاۋاپ بەرۋ قاجەتتىگىن اتاپ وتەمىز.
بارلىق سۇراقتار بويىنشا 1414 ءنومىرى بويىنشا Call-ورتالىققا حابارلاسىڭىز. قوڭىراۋ شالۋ تەگىن.