پرەزيدەنت قاسىم-جومارت توقايەۆ پارلامەنت پالاتالارىنىڭ بىرلەسكەن وتىرىسىندا «وتباسى بانك» قىزمەتىن قايتا قاراۋدى تاپسىردى، دەپ حابارلايدى Almaty-akshamy.kz.
«وتباسى بانكتىڭ» قىزمەتىن قايتا قاراۋ كەرەك. باستى نازاردى وبلىس ورتالىقتارىنا ەمەس، اۋداندارعا، مونوقالالارعا جانە اۋىلدارعا اۋدارعان ءجون»، - دەدى مەملەكەت باسشىسى.
سونىمەن بىرگە، پرەزيدەنت مەملەكەتتىك قولداۋ شارالارىن ءوندىرىستىڭ تەحنولوگيالىق كۇردەلىلىگىنە جانە بيزنەستىڭ ناقتى تۇرىنە قاراي جىكتەۋ ماڭىزدى ەكەنىن جەتكىزدى.
«ونىڭ وپەراسيالىق تيىمدىلىگى جوعارى بولۋى دا وتە ماڭىزدى. سوندىقتان «بايتەرەك» حولدينگىنىڭ قۇرىلىمىن وزگەرتىپ، ونى كەڭ اۋقىمدا سيفرلاندىرعان ءجون. باسەكە دامىماسا، بيزنەس تە وركەندەمەيدى. بۇل – ايدان انىق. ءقازىر نەگىزگى سالالاردىڭ كوبىندە بىرنەشە ءىرى كاسىپورىن باسىمدىققا يە بولىپ وتىر. بۇل جاعداي نارىقتاعى شىنايى احۋالدى كورسەتە المايدى»، - دەدى پرەزيدەنت.