پارلامەنت پالاتالارىنىڭ بىرلەسكەن وتىرىسىندا پرەزيدەنت قاسىم-جومارت توقايەۆ يننوۆاسياعا اقشا سالاتىن ينۆەستورلارعا قولداۋ كۇشەيەتىنىن اتاپ ءوتتى، دەپ حابارلايدى قازاقپارات ءتىلشىسى.
«مەنىڭ سايلاۋالدى باعدارلامامدا «عىلىم جانە تەحنولوگيالىق ساياسات تۋرالى» زاڭدى ازىرلەۋ تۋرالى باستاما كوتەرىلگەن. ازىرلەنىپ جاتقان زاڭ جوباسى ەكونوميكانىڭ دامۋ قيسىنىن عىلىم مەن يننوۆاسيا نەگىزىندە ايقىنداۋى قاجەت. بيزنەس-ينكۋباتورلار، كوممەرسيالاندىرۋ ورتالىقتارى، تەحنوپاركتەر مەن كونسترۋكتورلىق بيۋرولار سياقتى يننوۆاسيالىق ينفراقۇرىلىم قۇرۋ باعىتىندا جەكە باستامالاردى قولداۋدىڭ ءسوز جۇزىندەگى ەمەس، پارمەندى شارالارى قاجەت. تابىستى شەتەلدىك تاجىريبەلەردى پايدالانۋ كەرەك»، - دەدى مەملەكەت باسشىسى.
پرەزيدەنت يننوۆاسيالىق جوبالاردى ىسكە قوسۋدىڭ نەگىزگى كوزى ۆەنچۋرلىك قارجىلاندىرۋ بولۋى ءتيىس ەكەنىن اتادى.
«سوندىقتان وتاندىق جانە شەتەلدىك ينۆەستورلاردىڭ جوبالارعا دەگەن قىزىعۋشىلىعىن ارتتىرۋ ءۇشىن بارلىق قۇقىقتىق جانە قارجىلىق ماسەلەلەردى شەشۋ قاجەت»، - دەدى قاسىم-جومارت توقايەۆ.