وتباسى بانك جالعا بەرىلەتىن تۇرعىن ۇيگە سۋبسيديا الۋ ءۇشىن بەرىلگەن كەيبىر قازاقستاندىقتار ءوتىنىمىنىڭ قابىلدانباۋ سەبەبىن ءتۇسىندىردى، دەپ حابارلايدى اlmaty-akshamy.kz قازاقپاراتقا سىلتەمە جاساپ.
«ءبىز باعدارلاما باستالعاندا 17 مىڭ قازاقستاندىققا جالعا بەرىلەتىن تۇرعىن ءۇي سۋبسيدياسىن الۋعا شاقىرتۋ حابارلاماسىن جىبەردىك. ونىڭ ىشىندە 1662 ازاماتتان ءوتىنىم كەلىپ ءتۇستى. سونىڭ ىشىندە 259 ازاماتتىڭ ءوتىنىشى قاناعاتتاندىرىلدى. ياعني ولار باعدارلاماعا قاتىسىپ، سۋبسيديا الا الادى. بۇل باعدارلاما ءۇشىن سيفرلىق پلاتفورما ازىرلەندى، اتالعان جۇيە تۇرعىن ۇيگە مۇقتاج ازاماتتى اۆتوماتتى تۇردە انىقتايدى. وعان بانك قىزمەتكەرلەرى اسەر ەتە المايدى. ازاماتتاردىڭ جەكە دەرەكتەرى مەملەكەتتىك ورگانداردىڭ بازاسىنان تىكەلەي الىنادى»، - دەدى «وتباسى بانك» اق باسقارما ءتوراعاسى ءلاززات يبراگيموۆا ورتالىق كوممۋنيكاسيالار قىزمەتى الاڭىندا وتكەن باسپا ءسوز ءماسليحاتىندا.
ونىڭ ايتۋىنشا، 105 قازاقستاندىق ءوتىنىم بەرىپ، كەيىن قايتا باس تارتقان. سونىمەن قاتار تەحنيكالىق سەبەپتەرگە بايلانىستى 947 ءوتىنىم قابىلدانبادى.
«ءدال ءقازىر 128 ءوتىنىم تەكسەرۋدەن ءوتىپ جاتىر. سول سياقتى سۋبسيديا باعدارلاماسىنىڭ تالابىنا سايكەس كەلمەيتىن 61 ازاماتتىڭ ءوتىنىمى كەرى قايتارىلدى. كەيبىر وتىنىمدەر قابىلدانباي كەرى قايتارىلىپ جاتىر. ونىڭ سەبەبى ءوتىنىم بەرۋشى ۇيالى تەلەفونىن كورسەتۋ قاجەت. ۇيالى تەلەفون ءنومىرى مەملەكەتتىك جەكە دەرەكتەر بازاسىنداعى نومىرمەن سايكەس كەلۋى كەرەك. ياعني ەكى جاقتا ەكى ءتۇرلى نومەر بولسا ءوتىنىم قابىلدانبايدى»، - دەيدى ول.