قىزىل كىتاپقا ەنگەن قۇستار نەدەن ءولدى؟

ماماندار ماڭعىستاۋدا قوقيقازداردىڭ ءولۋ سەبەبى تۋرالى بولجامىن ايتتى

ماڭعىستاۋ وبلىسىندا ولگەن قوقيقازداردىڭ تابىلۋىنا قاتىستى وبلىستىق ورمان شارۋاشىلىعى جانە جانۋارلار دۇنيەسى اۋماقتىق ينسپەكسياسى تۇسىنىكتەمە بەردى، دەپ حابارلايدى اlmaty-akshamy.kz قازاقپاراتقا سىلتەمە جاساپ.

«24.04.2022 جىلى Facebook الەۋمەتتىك جەلىسىندە بەينەۋ اۋدانىنا قاراستى سام قۇمىندا قازاقستاننىڭ قىزىل كىتابىنا ەنگەن 5 باس قوقيقازدىڭ (فلامينگو) ولگەن دەنەلەرى قۇم اراسىندا جاتقانى تۇسىرىلگەن بەينەجازبا تارالعان. قازىرگى تاڭدا وسى وقيعا بويىنشا «سام» مەملەكەتتىك ورمان قورىنىڭ ينسپەكتورلارى جەدەل تۇردە بارىپ، انىقتاۋ جۇمىستارىن جۇرگىزۋدە. سونىمەن بىرگە «وحوتزووپروم» ءوب» رمقك-نىڭ اقتوبە فيليالىنىڭ ينسپەكتورلارى، بەينەۋ اۋداندىق ءپب-نىڭ قىزمەتكەرى بەينەۋ اۋدانىنىڭ اۋماعىنداعى سام قۇمى جانە وعان ىرگىلەس جاتقان اۋماقتاردى شولۋ جۇمىستارىن جۇرگىزۋدە»، - دەلىنگەن ماڭعىستاۋ وبلىستىق ورمان شارۋاشىلىعى جانە جانۋارلار دۇنيەسى اۋماقتىق ينسپەكسياسى تاراتقان حابارلامادا.

ۆەدومستۆو بۇل وقيعاعا قاتىستى ءوز بولجامىن دا جاساعان.

«سوڭعى كەزدەردە ماڭعىستاۋ وبلىسىنىڭ اۋماعىندا داۋىل سوعىپ، كۇن جەلدى بولىپ تۇر. جىل قۇستارىنىڭ ميگراسياسى بەينەۋ اۋدانى اۋماعىنان وتەدى. وسىنداي قولايسىز اۋا رايىندا قۇستاردىڭ ميگراسياسى كەزىندە ىشىندەگى السىزدەرى ورتا جولدا قونىپ، ءارى قاراي سولتۇستىك باعىتقا ۇشا الماي، ولاردىڭ ولىمىنە اكەلگەن بولۋى مۇمكىن. بۇل اۋماقتا سۋ كوزدەرى جوق. قۇستار تابىلعان جاعدايدا، ۆەتەرينارلىق دارىگەرلەر تاراپىنان ءتيىستى سىنامالار الۋ جۇمىستارى جۇرگىزىلەدى»، - دەپ مالىمدەيدى تابيعات قورعاۋشىلارى.