وتاندىق تۋريزم پاندەميانىڭ كەسىرىنەن ميللياردتاعان شىعىنعا ۇشىرادى

الايدا شەكارالاردىڭ جابىلۋىنان ىشكى تۋريزمگە دەگەن سۇرانىستىڭ ارتقانى بايقالدى.

كوروناۆيرۋس پاندەمياسى سالدارىنان وتاندىق تۋريزم ميللياردتاعان شىعىنعا باتتى، دەپ حابارلايدى Almaty-akshamy.kz

بۇل - Kazakh Tourism اق ۇلتتىق كومپانياسىنىڭ باسقارما ءتوراعاسى تالعات امانبايەۆتىڭ ءسوزى.

«تۋريزم - پاندەميادان ەڭ زارداپ شەككەن سالانىڭ ءبىرى. وسى ورايدا وتاندىق تۋريزم دە ميللياردتاعان شىعىنعا ۇشىرادى. الايدا شەكارالاردىڭ جابىلۋىنان ىشكى تۋريزمگە دەگەن سۇرانىستىڭ ارتقانى بايقالدى. 2021 جىلى قازاقستاندا ىشكى تۋريستەر سانى بويىنشا رەكورد جاڭاردى. ياعني بىلتىر ىشكى تۋريستەردىڭ سانى ارتىپ، 6،9 ميلليون ادامعا جەتتى. بۇل پاندەمياعا دەيىنگى (2020 جىل) دەڭگەيدەن 5 پايىزعا جانە 2019 جىلعى كورسەتكىشتەن 35 پايىزعا جوعارى»، - دەدى تالعات امانبايەۆ.

ونىڭ ايتۋىنشا، ىشكى تۋريزمگە سۇرانىستىڭ ارتۋىنا بايلانىستى قوناق ۇيلەر مەن دەمالىس ورىندارىنىڭ قىزمەتى 90%-عا ارتقان.

«ستاتيستيكاعا سۇيەنسەك، دەمالىس ورىندارى مەن قوناق ۇيلەر سانىنىڭ ءوسۋى بايقالادى. 2020 جىلى ولاردىڭ سانى 3 514-كە جەتتى. سونداي-اق، وتكەن جىلى ەلىمىزدە 172 جاڭا دەمالىس ورنى پايدا بولدى. سايكەسىنشە، تۋريستەر دەمالاتىن بولمە قورى ۇلعايىپ، 193 030 توسەك-ورىندى قۇرادى. بۇل وتكەن جىلمەن سالىستىرعاندا 9 417 توسەك-ورىنعا ارتىق»، - دەيدى ول.