پرەزيدەنت تاپسىرمالارىن ورىنداۋ اياسىندا وتاندىق تاۋار وندىرۋشىلەر ەنەرگەتيكا مەن تۇرعىن ۇي-كوممۋنالدىق شارۋاشىلىعىن جاڭعىرتۋعا بەلسەندى تۇردە تارتىلىپ وتىر.
ۇكىمەتتە وتكەن باسپا ءسوز ءماسليحاتىندا پرەمەر-مينيستردىڭ ورىنباسارى قانات بوزىمبايەۆ ەنەرگەتيكا جانە كوممۋنالدىق سەكتورلاردى جاڭعىرتۋ جونىندەگى ۇلتتىق جوبانىڭ تاجىريبەلىك كەزەڭى باستالعانىن حابارلادى. مەملەكەت باسشىسى ينفراقۇرىلىم سالاسىنداعى ءبىرىنشى كەزەكتەگى ماسەلەلەردى شەشۋگە باسا ءمان بەرىپ وتىر.
ەنەرگەتيكالىق جانە كوممۋنالدىق سەكتورلاردى جاڭعىرتۋ جونىندەگى ۇلتتىق جوبا 2024 جىلعى جەلتوقساندا بەكىتىلدى. ۇلتتىق جوبانى قۇقىقتىق قامتاماسىز ەتۋ ماقساتىندا 17 شىلدەدە مەملەكەت باسشىسى ءتيىستى زاڭعا قول قويىپ، ول 29 شىلدەدە كۇشىنە ەندى. الدىن الا ەسەپ بويىنشا جوبانى بەس جىلدان اسا مەرزىمدە ىسكە اسىرۋ ءۇشىن 13 تريلليون تەڭگەدەن استام ينۆەستيسيا تارتۋ قاجەت. بۇل قاراجات 86 مىڭ شاقىرىم كوممۋنالدىق جەلىنى قايتا جاڭعىرتۋ مەن جاڭادان سالۋعا جانە جيىنتىق قۋاتتىلىعى 7،3 گيگاۆاتت بولاتىن گەنەراسيالاۋ كوزدەرىن ىسكە قوسۋعا باعىتتالادى.
قارجى ءتورت نەگىزگى كوزدەن تارتىلماق: وتاندىق جانە حالىقارالىق قارجى ينستيتۋتتارى، ەكىنشى دەڭگەيدەگى بانكتەر، مەملەكەتتىك بيۋدجەت پەن ۇلتتىق قور قاراجاتى، سونداي-اق جەكە اكسيونەرلەردىڭ – بيزنەس يەلەرىنىڭ قاراجاتى. ۇلتتىق جوبانىڭ پيلوتتىق كەزەڭىنە 35 تابيعي مونوپوليا سۋبەكتىسى قاتىسۋدا. قوسىمشا 22 جوبا قاراستىرىلۋ ۇستىندە. جىل سوڭىنا دەيىن 6 ينفراقۇرىلىمدىق كومپانيا ينجەنەرلىك جەلىلەردىڭ توزۋ دەڭگەيىن «قىزىل» ايماقتان «ورتاشا» دەڭگەيگە دەيىن تومەندەتىپ، 40%-عا دەيىن جەتكىزۋى جوسپارلانعان.
پيلوتتىق رەجيم اياسىندا بيىلعى جىلى 150 ملرد تەڭگەگە جۋىق ينۆەستيسيا تارتىلىپ وتىر. بۇل قاراجات ەسەبىنەن 8،5 مىڭ شاقىرىم ينجەنەرلىك جەلىنى جوندەۋ جانە 42 مىڭنان استام جابدىقتى جاڭارتۋ كوزدەلگەن.
ۇلتتىق جوبادا ەلىشىلىك قۇندىلىقتى ارتتىرۋعا دا ەرەكشە كوڭىل بولىنگەن. جالپى سوماسى 2 ترلن 140 ملرد تەڭگەنى قۇرايتىن 2 786 تاۋار پوزيسياسى بويىنشا وتاندىق وندىرۋشىلەردەن تۇراتىن 220 كومپانيادان پۋل جاساقتالدى. بۇدان بولەك، وڭىرلىك دەڭگەيدە ليسەنزيا العان 669 EPC-مەردىگەرگە تالداۋ جۇرگىزىلدى. وتاندىق وندىرۋشىلەردى قولداۋ يمپورتقا تاۋەلدىلىكتى ازايتىپ، جاڭا جۇمىس ورىندارىن اشۋعا جانە بيۋدجەتكە تۇسەتىن سالىق كولەمىن ارتتىرۋعا مۇمكىندىك بەرەدى.
ۇلتتىق جوبانى ءتيىمدى جۇزەگە اسىرۋدىڭ ماڭىزدى قۇرالى رەتىندە سيفرلاندىرۋ ەنگىزىلۋدە. بۇل ۇدەرىستەردىڭ اشىقتىعىن، جۇمىستاردىڭ مەرزىمى مەن ساپاسىن قاداعالاۋدى قامتاماسىز ەتىپ قانا قويماي، قاتىسۋشىلار ءۇشىن دە قولايلى ورتا قالىپتاستىرادى. قازىرگى تاڭدا ەكى نەگىزگى سيفرلىق باعىت جۇزەگە اسىرىلۋدا: «سامۇرىق-قازىنا» پورتالى نەگىزىندە قۇرىلعان ەلەكتروندى ساتىپ الۋ پلاتفورماسى جانە «SMART TURMYS» تۇرعىن ۇي-كوممۋنالدىق شارۋاشىلىق اقپاراتتىق جۇيەسى. سونىمەن قاتار، ارنايى web-پورتال مەن بايلانىس ورتالىعى ازىرلەنىپ جاتىر. بۇل رەسۋرستار ارقىلى ۇلتتىق جوبانىڭ ىسكە اسىرىلۋ بارىسى تۋرالى اقپارات بارشا ازاماتقا قولجەتىمدى بولادى.