قارجى پيراميدالارى ازاماتتارعا ايتارلىقتاي ءقاۋىپ ءتوندىرىپ وتىر. وسىعان بايلانىستى الماتى قالاسىنىڭ قۇقىق قورعاۋ ورگاندارى ولاردى اشكەرەلەپ، جولىن كەسۋدى كۇشەيتتى. 2025 جىلدىڭ 7 ايىنىڭ ىشىندە 1 000-نان استام ادام زارداپ شەككەن 10 الاياقتىق جوبا توقتاتىلعان. الماتى قالاسى بويىنشا ەكونوميكالىق تەرگەپ-تەكسەرۋ دەپارتامەنتى باسشىسىنىڭ ورىنباسارى سابىرعالي بالعالي ۇلى وڭىرلىك كوممۋنيكاسيالار قىزمەتىندە وسىلاي دەدى.
مەملەكەت باسشىسى ايقىنداعان «زاڭ جانە ءتارتىپ» قاعيداتىن ىسكە اسىرۋ اياسىندا قۇقىق قورعاۋ ورگاندارى قارجى پيراميداcىنا قارسى بەلسەندى جۇمىس ىستەپ جاتىر. الماتىدا مۇنداي جۇيەنى انىقتاپ، ونى جويۋدى كوزدەيتىن ءىس-شارالار ۇزبەي وتكىزىلىپ تۇرادى.
ينتەرنەتتە الاياقتىقتى ناسيحاتتاۋعا قارسى كۇرەسەتىن ماڭىزدى قۇرالدىڭ ءبىرى – «كيبەرباقىلاۋ» اقپاراتتىق جۇيەسى. ءقازىر وسى جۇيەنىڭ كومەگىمەن 846 جارنامالىق سىلتەمە بۇعاتتالىپتى.
جىل باسىنان بەرى ەكونوميكالىق تەرگەپ-تەكسەرۋ دەپارتامەنتى قالا بويىنشا قارجى پيراميداسىن ۇيىمداستىرعان وسىنداي 10 جۇيەنىڭ جولىن كەستى. ودان 1 000-نان استام ازامات زارداپ شەگىپ، بيىل 6 قىلمىستىق ءىس سوتقا جىبەرىلىپتى. 2023–2024 جىلدارى بۇل كورسەتكىش 31 ءىس بولعان ەكەن.
تەرگەۋ ءىس-شارالارى اياسىندا ۇيىمداستىرۋشىلاردىڭ بانك شوتىنا، جىلجىمالى جانە جىلجىمايتىن مۇلكىنە 7،7 ميلليارد تەڭگە كولەمىندە تىيىم سالىندى.
مىسالى، «ءۇيلى بولايىق» دەيتىن جالعان الەۋمەتتىك جوبانىڭ جۇمىسى توقتاتىلدى. ولار ءوزىن قايىرىمدىلىقپەن اينالىساتىن تۇرعىن ءۇي باعدارلاماسى رەتىندە كورسەتىپ، پايىزسىز ءبولىپ تولەۋ ارقىلى ءۇي الىپ بەرەمىز، سالىم سوماسىنىڭ 15–30% مولشەرىندە تابىس تاباسىزدار دەپ الداپ، وسى جۇيەگە ادام تارتقاندارعا بونۋس بەرمەك بولعان. ءبىراق اقشانىڭ ءبارى ۇيىمداستىرۋشىلاردىڭ جەكە شوتىنا ءتۇسىپ، قوردىڭ ەسەپشوتىن مۇلدەم قولدانباعان. ولار ءسويتىپ 515 سالىمشىدان 50 ميلليون تەڭگەدەن استام قارجى جيناعان. ءقازىر كۇدىكتىنىڭ بانك شوتىنا تىيىم سالىنىپ، وعان قاتىستى ەلدەن شىقپاۋ تۋرالى قولحات تۇرىندەگى بۇلتارتپاۋ شاراسى قولدانىلدى.
سونىمەن قاتار، قازىرگى ۋاقىتتا «Warner Bros»، «Roborock» جانە «NFT+TRX» اتاۋىمەن تاعى ءۇش جۇيەگە قاتىستى قىلمىستىق ىستەر تەرگەلىپ جاتىر. 2024 جىلدىڭ قازانىنان 2025 جىلدىڭ قاڭتارىنا دەيىن ۇيىمداستىرۋشىلار الەۋمەتتىك جەلىلەردەگى تارگەتتەلگەن جارناما ارقىلى ازاماتتاردى وسىنداي جوبالارعا تارتىپ، بەينەمازمۇندى كورۋ ارقىلى جىلدام پايدا تابۋعا ۋادە بەرگەن. قاتىسۋشىلار كريپتوۆاليۋتا ارقىلى قوسىمشالاردى ساتىپ العاننان كەيىن، ولارعا سىياقىلار ەسەپتەلىپ وتىرعانداي كورىنگەن. الايدا بۇل بۇرىننان بەلگىلى پيراميدا جۇيەسى بولىپ شىقتى. العاش كىرگەندەردىڭ تابىسىن كەيىنگىلەردىڭ سالىمىنىڭ ەسەبىنەن تولەپ وتىرعان. تەرگەۋ بارىسىندا الاياقتار قولدانعان كريپتوۆاليۋتا ءاميانى انىقتالىپ، 3،8 ملن USDT كولەمىندە شەكتەۋ قويىلدى.
«تەرگەۋ جالعاسىپ جاتىر، ناتيجەسىن ۋاقىتىلى جاريالاپ وتىرامىز. قارجى پيراميداسىنا ءار ادام ءوز ەركىمەن جانە زاڭ اياسىنان تىس كىرەدى. سوندىقتان سالعان اقشاڭىزدى قايتارۋعا ەشكىم كەپىلدىك بەرمەيدى. دەگەنمەن، كەيبىر جابىرلەنۋشىلەرگە اقشاسىن قايتارىپ بەرگەن. شىعىندى وتەۋ تۋرالى شەشىمدى تەك سوت قابىلدايدى»، – دەپ اتاپ ءوتتى سابىرعالي بالعالي ۇلى.
الماتى قالاسى بويىنشا ەكونوميكالىق تەرگەپ-تەكسەرۋ دەپارتامەنتى ازاماتتاردى قىراعى بولۋعا، جىلدام پايدا تابۋعا شاقىراتىن كۇماندى جوبالارعا سەنبەۋگە شاقىردى.
ەگەر ءسىز نەمەسە ءسىزدىڭ جاقىندارىڭىز وسىنداي كۇدىكتى ۇيىمداردىڭ قارماعىنا ءتۇسىپ قالىپ جاتسا، الماتىنىڭ ەكونوميكالىق تەرگەپ-تەكسەرۋ دەپارتامەنتىنە جىبەك جولى داڭعىلى، 127 مەكەنجايى بويىنشا نەمەسە 1458 نومىرىندەگى كولل-ورتالىققا جەدەل تۇردە حابارلاسۋىڭىزدى سۇرايمىز.