الماتى تۇرعىنى داۋرەن نىعمەتمىڭجاني جۇك كولىكتەرىنە ارنالعان اۋا سۇزگىلەرىن جاساۋ ءۇشىن 20 ملن. تەڭگە كولەمىندە جەڭىلدەتىلگەن نەسيە الدى. قاراجات «Almaty Business–2025» مەملەكەتتىك باعدارلاماسى اياسىندا بولىنگەن.
– مەن ءۇش جىلعا جىلدىق 6%-بەن نەسيە الدىم، سوعان وراي 6 ايعا «سالىقتىق دەمالىس» بەرۋدى ءوتىندىم. بۇل ءوز كاسىبىمدى اشامىن دەگەن تاۋەكەلشىل جاندارعا مەملەكەت تاراپىنان كورسەتىلىپ وتىرعان وتە ۇلكەن قولداۋ دەپ سانايمىن. ويىڭا العان ءىستى جۇزەگە اسىرۋ باستاپقى كەزەڭدە كىم-كىمگە دە وڭايعا تيمەيدى. وسى ورايدا «Qoldaý» كاسىپكەرلىك ورتالىعىنىڭ ماعان بەرگەن تەگىن كاسىپكەرلىك كەڭەستەرىنە، بيزنەس-جوسپار ازىرلەۋىمە كومەكتەسىپ، جەڭىلدەتىلگەن نەسيەگە قول جەتكىزگەنىمە دەيىن بىرگە ءجۇرىپ رياسىز قولداۋ كورسەتكەن قىزمەتكەرلەرىنە العىسىمدى بىلدىرەمىن، – دەيدى داۋرەن نىعمەتمىڭجاني.
جۇك كولىكتەرىنە ارنالعان اۋا سۇزگىلەرى جاسالاتىن قاجەتتى شيكىزات – مىرىشتالعان تور مەن قاعازعا ارنالعان مەتالل بۋماسىن ءوزىمىزدىڭ ەلدەن ساتىپ الىپتى. بۇگىنگى نارىقتا مۇنداي شيكىزاتتىڭ رەسەيلىك جانە قىتايلىق تۇرلەرى بار، ءبىراق ولاردىڭ باعاسى اسا قىمبات. ال وتاندىق شيكىزاتتاردىڭ ساپاسى ولاردان كەم ەمەس دەيدى داۋرەن.
– ءبىزدىڭ ءونىم الماتى، اقتاۋ، تاراز، وسكەمەندە ۇلكەن سۇرانىسقا يە. ءقازىر ءبىز قىتايلىق «Hovo» جۇك كولىكتەرىنە ارنالعان اۋا سۇزگىلەرىن جاساپ جاتىرمىز. بولاشاقتا جەڭىل اۆتوكولىكتەرگە ارنالعان سۇزگىلەردى شىعارۋدى جوسپارلاپ وتىرمىز، – دەيدى ول.
ازىرگە قازاقستاندا ونىڭ قولعا العان سالاسى بويىنشا باسەكەلەستەر جوق. داۋرەننىڭ سەحى ايىنا 1500 دانا ءونىم وندىرەدى، 7 ادامدى جۇمىسپەن قامتىپ وتىر.