پرەمەر-مينيستر ولجاس بەكتەنوۆ «سامۇرىق-قازىنا» ۇلتتىق ءال-اۋقات قورى» اق ديرەكتورلار كەڭەسىنىڭ وتىرىسىن وتكىزدى، دەپ حابارلايدى aqshamnews.kz
جيىننىڭ باستى ماقساتى – قور كومپانيالارى توبىنىڭ نەگىزىندە مەملەكەت باسشىسىنىڭ ەكونوميكانى ىرىقتاندىرۋ جونىندەگى تاپسىرمالارىن ورىنداۋ بارىسىن باقىلاۋ. قوردىڭ باسقارما ءتوراعاسى نۇرلان جاقىپوۆ بيىلعى 11 ايداعى وندىرىستىك جانە قارجىلىق كورسەتكىشتەر بويىنشا بايانداما جاسادى.
قازىرگى ۋاقىتتا «سامۇرىق-قازىنا» اق كومپانيالار توبىنىڭ ينۆەستيسيالىق پورتفەلى جالپى سوماسى 53،5 ترلن تەڭگەنى قۇرايتىن 130-عا جۋىق جوبانى قامتيدى.
ۇكىمەتتىڭ ەرەكشە باقىلاۋىنداعى 44 ينۆەستيسيالىق ءىرى جوبانىڭ جۇزەگە اسىرىلۋ بارىسى قارالدى. بۇل جوبالارعا مۇناي-گاز، مۇناي حيمياسى، ەنەرگەتيكا، كولىك-لوگيستيكا جانە تاۋ-كەن سەكتورلارىنا سالىنعان قارجىنىڭ جالپى كولەمى 28،8 ترلن تەڭگە. قازىرگى ۋاقىتتا 23 جوبا بويىنشا ەرس-كەلىسىمدەر جاسالىپ، 15 جوبادا قۇرىلىس-مونتاجداۋ جۇمىستارى باستالعان.
نۇرلان جاقىپوۆ «تالدىقورعان – ءۇشارال» ماگيسترالدى گاز قۇبىرى جوباسى بويىنشا 302 شاقىرىمدىق گاز قۇبىرىنىڭ 95،5 شاقىرىمى تارتىلعانىن جانە جۇمىستاردىڭ مەرزىمىنەن بۇرىن اياقتالىپ جاتقانىن اتاپ ءوتتى. سونىمەن قاتار، «دوستىق – مويىنتى» تەمىرجول ءدالىزىن جاڭعىرتۋ اياسىندا جوسپارلانعان 836 شاقىرىم جولدىڭ 786 شاقىرىمى سالىنعان.
پرەزيدەنتتىڭ تاپسىرماسىنا سايكەس، الەۋمەتتىك ماڭىزعا يە جوبالاردى جۇزەگە اسىرۋ ءۇشىن جەكە كومپانيالاردىڭ قارجىسىن تارتۋ جۇمىستارى جالعاسۋدا. وسى ورايدا، قىزىلوردا وبلىسىندا قۋاتى 1 گۆت جەل ەلەكتر ستانسيالارىن ىسكە قوسۋ جوباسى بويىنشا Masdar (ءباا) كومپانياسىمەن بىرلەسكەن ينۆەستيسيالىق كەلىسىمگە قول قويىلدى.
شىمكەنت پەن باتىس قازاقستان وبلىستارىندا از قامتىلعان وتباسىلارعا ارنالعان «الەۋمەتتىك ءاميان» پيلوتتىق جوباسى ىسكە قوسىلدى. بۇل جوبا اتاۋلى الەۋمەتتىك كومەك الاتىن ازاماتتارعا گازبەن جابدىقتاۋ تاريفتەرىندە جەڭىلدىكتەر ۇسىنۋدى كوزدەيدى.
قوردىڭ 11 ايلىق ەسەبىندە وتاندىق تاۋار وندىرۋشىلەردى قولداۋ ماقساتىندا وفتەيك-كەلىسىمدەردىڭ سوماسى 182،3 ملرد تەڭگەگە جەتكەنى، بۇل كورسەتكىش وتكەن جىلمەن سالىستىرعاندا 12 ەسەگە وسكەنى ايتىلدى. جالپى، وتاندىق تاۋار وندىرۋشىلەرمەن 1 ترلن تەڭگەدەن استام سوماعا كەلىسىمشارت جاسالدى، بۇل وتكەن جىلمەن سالىستىرعاندا 83%-عا جوعارى.
2025-2029 جىلدارى قوردىڭ مەنشىكتى قاراجاتىنان 3،6 ترلن تەڭگە، ال جالپى 9،6 ترلن تەڭگە ينۆەستيسيا سالۋ جوسپارلانعان.
وتىرىس قورىتىندىسى بويىنشا ءبىرقاتار قۇجاتتار قابىلدانىپ، الداعى كەزەڭگە ارنالعان جۇمىس جوسپارى بەكىتىلدى. قور باسشىلىعى مەن قىزمەتكەرلەرىنىڭ تيىمدىلىگى وتاندىق قامتۋ ۇلەسىن ارتتىرۋ كورسەتكىشتەرىمەن باعالاناتىن بولادى.